उपसमितिया बैठक निष्कर्ष विहीन

येँ(सन्ध्या टाइम्स)/न्हूगु संविधान निर्माणया निंतिं विवादित विषय ज्यंकेगु लागिं दयेकातःगु संविधानसभाया संवैधानिक समिति अन्तर्गत गठित उपसमितिया थौं सुथय् च्वंगु बैठक निष्कर्ष विहीन जूगु दु।
सिंहदरवारया संसदीय सचिवालयया कार्यालय दुने च्वंगु उगु बैठकय् शासकीय स्वरुप व निर्वाचन प्रणालीया प्रतिवेदनयात कयाः सहलह जूगु खः।
उपसमितिया अध्यक्ष प्रचण्डं संचारकर्मीतलिसे खँल्हासें धयादिल, 'थौं छुं नं निष्कर्षय् थ्यंगु मदु, थःथःगु दलया दुने व उपसमितिइ नं थप छलफल यानाः निष्कर्षय् वनेगु जुइ।'
बैठकय् न्ह्यब्वःगु शासकीय स्वरुप सम्बन्धी प्रतिवेदनयात पूवंक सार्वजनिक याःगु मदुनि। तर राष्ट्रपतीय, संसदीय व मिश्रित प्रणालीया सकारात्मक व नकारात्मक पक्षया धलः नापं प्रतिवेदनय् उल्लेख जुयाच्वंगु दु।
उपसमितिइ सहलह लिपा जक प्रतिवेदन सार्वजनिक यायेगु जुइ धकाः प्रचण्डं धयादीगु दु। निर्वाचन प्रणालीया बारे धाःसा मिश्रित प्रणाली जुइगु लगभग निश्चित जुइधंकूगु दु।
बैठक लिपा कांग्रेसया संसदीय दलया नेता रामचन्द्र पौडेलं कार्यदलया बारे थीथी सुझाव वःगु व संसदीय व्यवस्था जक थःपिंत मान्य जुइ धकाः न्ह्यथँसें धयादिल, 'नेपाःया विविधतायात संवोधन यायेत संसदीय प्रणाली बाहेक मेगु छुं नं कथंया शासकीय प्रणाली उपयुक्त जुइ मखु।'
नेतातय् लिमलाःगु नापं विदेशय् वनेमाःगुलिं तःन्हु लिपा वयाः जक थौं उपसमितिया बैठक च्वंगु खः।