बिप्पा व ७ बुँदे सम्झौता लेनदेन

भारतय् बिप्पा जुइवं नेपालय् समायोजन फुक्का
येँ(सन्ध्या टाइम्स)/प्रधानमन्त्री डा. बाबुराम भट्टराईनं भारतय् वनाः यानादीगु बिप्पा सम्झौता व नेपालय् स्वंगू दल लिसें मधेसी मोर्चा दथुइ जूगु न्हय्गू बुँदाया सम्झौता छगू कथं 'लेनदेन' या रुपय् जूगु खँ सीदुगु दु। विज्ञ सूत्रं धाः कथं
भारतय् बिप्पा सम्झौता जुइवं भारतया हे ग्वाहालि कयाः नेपालय् उगु शान्ति सम्झौता जुइत ताःलाःगु खः।
भारत भ्रमणय् वंम्ह प्रधानमन्त्रीयात भारतपाखें यदि बिप्पा सम्झौताय् हस्ताक्षर यायेगु खःसा नेपालय् समायोजन याये माःपिं माओवादी लडाकुया ल्याःयात कयाः वयाच्वंगु विवाद व अवकास काइपिं लडाकुतय्त बीगु राहत प्याकेजय् वयाच्वंगु विवाद समाधान याना बी धइगु आश्वासन वयेवं प्रम भट्टराईनं उकी हस्ताक्षर यानादीगु खः।
धाः गथे अथे हे भारतय् बिप्पा सम्झौता यानाः प्रम लिहां वयेवं हे नेपालय् न्हय्गू बुँदाया सम्झौता सम्पन्न जूगु खः। माओवादी लडाकु मध्ये न्याद्वः स्वयां अप्वःयात समायोजन याके बी मखु व पुनर्संस्थापनाय् वनीपिं लडाकुतय्त नं स्वंगू लाख स्वयां अप्वः ध्यबा बी मखु धकाः अडान कयाच्वंपिं कांग्रेस नेतातय्सं बिप्पा सम्झौता सम्पन्न जुइवं सेनाय् ६५०० लडाकुयात समायोजन यायेगु व पुनर्संस्थापनाय् वनीपिंत नं गुंगू लाख तक ध्यबा बीगु खँय् सहमति प्वंकूगु खः।
प्रम भट्टराईनं बिप्पा सम्झौताय् हस्ताक्षर यायेवं भारतं सेना समायोजनया खँ अडान कयाच्वंपिं कांग्रेस नेतातय्त अडान त्वःतके बिउगु खः। सूत्रया कथं प्रम भट्टराईनं थ्व इतिवृत्तान्त पार्टी अध्यक्ष प्रचण्डयात पूवंक कनादीधुंकूगु दु।
थौं माओवादीया केन्द्रीय बैठक
बिप्पा व न्हय्गू बुँदाया सम्झौता लिपा माओवादी लिसे तच्वया वःगु विवादयात कयाः थौं पार्टी केन्द्रीय कमिटीया बैठक च्वनेत्यंगु दु। थौं न्हिनय् च्वनेगु कथं सःता तःगु बैठकय् असन्तुष्ट नेता मोहन वैद्य पुचलं बिप्पा व न्हय्गू बुँदे सम्झौता लिपा पार्टीइ पेश याःगु झिगू बुँदाया पौयात कयाः सहलह जुइ। तसकं विवाद जुइगु बैठक जुयाः थ्व न्हि ताःहाकः जुइगु अनुमान दु।