असीम सम्भावनादथ्वी सार्क सम्मेलन क्वचाल

झिंन्हय्क्वःगु सार्क सम्मेलन वंगु शुक्रवाः नीगू बुंदे घोषणापत्र सार्वजनिक यासे क्वचाःगु दु । न्हापा न्हापा सम्मेलन क्वचायेवं हप्तौं तक्कनं उकियाहे विषयलय् चिवा चर्चा जुया च्वनीगु खः । तर थुगसी अथ्य छुं हे मजुसे सम्मेलन न्ह्यात क्वचाल थुकीइहे लिकुन । न सम्मेलनया उलेज्या सत्रयात सुनां छुं खँ न्ह्यथन नत २० बुंदे घोषणापत्रयात हे कयाः क्वाः क्वाःगु वहस जुल । थुगुकथं थुगसीया सार्क सम्मेलनय् खास नेता शासक राज्य प्रमुखपिनिगु पाखें न्ह्यथनेबहःगु खास ज्या मजुलसा सञ्चार माध्यमतय्सं नं उलि प्रचार प्रसारय् महल । अथ्य धयागु सार्क सम्मेलनं मनूतय्सं आशा याःथे विगतय् भूमिका म्हिते मफूगु व वइगु भविश्यय् नं सार्कप्रति मनूतय्गु विश्वास कायेमफूगु खँयात प्रष्ट याइ । छु सार्कयात आः थुगुकथं औपचारिकताय् लिकुंकेगु ज्या जक जुइगु खःला ? न्ह्यसः दनावइगु अस्वभाविक मखु । वइगु झिंच्याक्वःगु सार्क सम्मेलन नेपालय् याइगु जूगु दु । तर थ्व गवलेपाखे जुइ धयागु खँ निश्चितरुपं सुनांनं धायेफूगु अवस्था मदु । २०१३ सालय् सार्क सम्मेलन नेपालय् जुइगुला निश्चित जुइ धुंकूगु दु । थुया दथुइ सार्क स्वतन्त्र व्यापार क्षेत्र -साफ्ता) या प्रतिवद्धता कार्यान्वयनय् यंकेगु नितिं माःगु निर्धारित भंसाः दर रेट म्हो यायेगु व सर्वसनशील उत्पादन सूची दयेकेगु, साफ्ताया प्रभावकारितालिसें सार्क क्षेत्रयात बृहत्तर आर्थिक प्रभाव जुइगु राजधानीया रुपय् विकसित यायेगु व अन्तरक्षेत्रिय दीर्घकालिन लगानीया आधारय् म्हसीकेत थ्व क्षेत्रया अर्थमन्त्रीयात विशेष प्रस्ताव तयार याइगु जूगु जुइ । मेगु दँय् माल्दिभ्सय् सार्क स्तरीय ट्राभल टुरिजम मेला यायेत्यंगु दु ।

थ्व वाहेक सार्कं खाद्य वैंकया प्रभावकारिता व कार्यान्वयनय् संयन्त्र तयार याइगु जूगु दु । मिसा व मस्त न्यायेमीगु व वेश्यावृद्धि विरुद्ध अभियान न्ह्याकेत विशेष सम्मेलन आयोजना यायेगु व दक्षिण एशियाया मञ्चं सार्कया आर्थिक परिषद् व थुकिया भविश्यया वारे क्षेत्रिय दृष्टिकोण प्रतिवद्धता तयार याइगु नं जूगु दु । अथ्यहे सार्क मिडिया दिवस हनेगु न्हि क्वछीगु व क्षेत्रिय आतंकवादया विषयलय् नं साझाः मंकाः अवधारणा दयेकेत नं सम्मेलन सदस्य देय्तय्त इनाप याइगु जूगु दु । सार्क राष्ट्रतय्गु दथ्वी सम्पर्क सुत्रया विकास यानायंकेगु उदेश्यं दूतावास अनिवार्यरुपं तयेगु नं खँ क्वछ्यूगु दु । थ्वहे झ्वलय् नेपालं निकट भविश्ययहे भुटान व अफगानिस्तानय् दूतावास चायेकेत्यंगु दु । सार्क राष्ट्रया शासकतय्गु दथ्वी सहलह जूगु, नापलाये ज्या जूगु दु । वंगु सार्क सम्मेलनं थीथी निर्णयत यानावःगु दु । साझा मुद्रा, सार्क हाइवे, सार्क उर्जा हव, सार्क विश्वविद्यालय, साझा व्यापार, निशुल्क भंसा लगायत निर्णयत कार्यान्वयनत जूगु मदुनि ।

सार्क विश्वविद्यालय सम्वन्धी छु ज्या जूसां व नं आः पेण्डिङ्गय् लाःगु दु । थुगुकथं निर्णय यायेगु दबुली लिकुंगु दु । सार्क सम्मेलनय् थःथःगु खँ तयेगु, घोषणा यायेगु अले उकियात कार्यान्वयनय् मयेकेवं थुइगु प्रभाकारितां करीव करीव सून्यय् थ्यंगु दु । थुकिं यानाः अन्तराष्ट्रिय ख्यलय् नापं बदनामी जुइगु शुरु जूगु दु । सार्क स्वयाः लिपा पिहां वःगु युरोपेली युनियन थौं गनं गन थ्यनेधुंकल, तर सार्क म्हिगः गन दु थौं नं अनहे तिनि धाःसां छु मपाइगु स्थितिइ दु । अथ्य धकाः सम्भावना मदुगु मखु, प्रचुर सम्भावनाया दथ्वी सक्षम नेतृत्वपक्षयात न्ह्यःने यंके फत धाःसा सार्कं नं ठोस ज्या यानाः क्यनेफु ।

More Stories Like this