प्यदँया दुने येँ—हेटौंडा सुरुङ मार्ग क्वचाइगु

येँ (झीगु स्वनिगः)

स्वनिगः व हेटौडा स्वाइगु सुरुङ मार्ग दयेकेत वंगु चैत्र २३ गते गठन याःगु नेपाल पूर्वाधार विकास कम्पनी व सरोकार समितिया ग्वसालय् वंगु शनिवाः जूगु सहलह ज्याझ्वलय् सुरुङ मार्गया आवश्यकताया विषययात कयाः सहलह जूगु दु । कम्पनीया नायः नापं नेपाल उद्योग वाणिज्य महासंघया निर्वतमान नायः कुश कुमार जोशीया सभापतित्वय् जूगु उगु ज्याझ्वलय् पुलांम्ह सांसद नापं सरोकार समितिया सल्लाहकार हिरण्यलाल श्रेष्ठं धयादिल 'नेपाः थें जाःगु पहाडी देशय् यातायात क्षेत्रय् आधुनिकीकरण धैगु हे तापाःगु थाय्यात फयां फत्तले सतीकेगु, ताः ई काइगु थासय् म्हो इलं थ्यंकेगु व पेट्रोल डिजेल थें जाःगु पेट्रोलियम पदार्थ तकं म्हो जक आयात यायेमालिगुलि सुरुङ मार्ग माःगु खः ।

चन्द्रागिरी व चिसा पानीगढी निथाय् जक सुरुङ पिचायेकेवं २ घण्टाया दुने हे स्वनिगलं हेटौंडाय् थ्यंके फैगु अवस्था वइ, न्हूगु नेपाः दयेकेत थ्व छगू सेल्लागु पूर्वाधार जुइ ।' कम्पनीया छ्याञ्जे सुभाष ठकरीं लसकुस न्वचु बियादीगु उगु ज्याझ्वलय् दांभरी जयराम लामिछानें नेपालय् निर्माण व्यवसायीत जानाः हे उगु सुरुङ मार्ग दयेकेफु धकाः धयादीगु खः । मलेसियाय् सुरुङ मार्गय् ज्या यानाः अनुभव मुंकादी धुंकूम्ह लाल केसीं नापं थीथी पक्षयापिं मनूतय्सं उगु भेलाय् ब्वति कयादीगु खः । उगु बृहत्त भेलां सरोकारवालातय्गु मार्खु घोषणा पत्र जारी याःगु खः ।

उगु घोषणा पतिइ फुक्क जानाः प्यदँया दुने सुरुङ मार्ग दयेका त्वःतेगु जुइ धकाः न्ह्यथनातःगु दु । वइगु जनवरी १ निसें प्यदँया दुने क्वचायेकेगु नितिं उगु कथं गृहकार्य जुयाच्वंगु खः । स्थानीय, जिल्ला विकास समिति, गाविस, उद्योग वाणिज्य ख्यःयाःपिं नापं गैर आवासीय नेपाःमितय्गु सहभागिताय् अथे सुरुङ मार्ग दयेकेत्यंगु खः । फोर पि अर्थात प्राइभेट, पब्लिक, स्थानीय निकाय, व जनसभागीताय् आर्थिक, श्रम, शीप लगानी यानाः अथे सुरुङ मार्ग दयेकेत्यंगु खः । येँ जिल्लाया थानकोटं सुरु जुयाः कुलेखानी, भिमफेडी व भैसे जुयाः हेटौंडाय् जुयाः पिचायेकेगु योजना दयेकूगु दु । उगु सुरुङ दयेकेत थ्यंमथ्यं २० अर्व तका मालीगु अनुमान याःगु दु ।