'राज्य पुनर्संरचनाया सवालय् षडयन्त्र’

द्वन्द्व इलय्या मुद्दा एकमुष्ट रुपं लित कायेमाः

येँ (झीगु स्वनिगः)

एकीकृत नेकपा -माओवादी)या छ्याञ्जे सीपी गजुरेलं संविधानसभाया राज्य पुनर्संरचना नापं राज्य शक्ति बाँडफाँट समितिपाखें तयार याःगु १४ प्रदेशया प्रस्तावयात फःपुइकेगु नितिं एकीकृत माओवादी, नेपाली कांग्रेस, एमाले नापं मधेसी मोर्चाया शीर्ष नेतातय्सं राज्य पुनर्संरचनाया विषययात कयाः विज्ञ पुचः दयेकत्यंगु खः धासें उकियात संसदं पारित याके बिइगु जुइमखु धकाः ख्याच्वः बियादीगु दु । वय्कलं विज्ञ पुचःया नितिं अन्तरिम संविधानया ११ क्वःगु संशोधन यायेत स्वीकार यायेगु जुइमखु धकाः नं ख्याच्वः बियादीगु दु । येँय् म्हिगः आइतवाः याःगु छगू ज्याझ्वलय् न्वंवासें नेता गजुरेलं अथे धयादीगु खः ।
वय्कलं धयादिल 'राज्य पुनर्संरचना समितिं प्रतिवेदन बिइ धुंकूगु अवस्थाय् विज्ञ समिति गठन यानाः प्रतिवेदन फःपुइकेगु षड्यन्त्र यानाच्वंगु दु । थ्व जिमित मान्य जुइमखु ।' एकीकृत माओवादीया छ्याञ्जे सीपी गजुरेलं पार्टीया नायः पुष्पकमल दाहाल प्रचण्ड व प्रधानमन्त्री नापं पार्टीया न्वकु डा. बाबुराम भट्टराई नं पार्टीया मूल एजेण्डाया अःखः वनाः आत्मसमर्पण यात धकाः द्वपं तकं बियादीगु खः ।

प्रधानमन्त्री भट्टराईया कार्यशैलीं थःपिन्त तकं ज्यामछिंगु अवस्था लाकूगु दु धयादिसें वय्कलं पार्टीइ सहलह हे मयासे प्यंगू बुँदाया सहमति याःगु, न्हय्गू बुँदाया सहमति याःगु, भारतलिसे विपा सम्झौता याःगु सरकारया जिम्मा थःपिन्सं काये फैमखु धकाः नं स्पष्ट यानादिल । मन्त्रिपरिषद्या विस्तार याःगु इलय् तकं पार्टीया नायः प्रचण्ड व प्रधानमन्त्रीं थःपिंलिसे सहलह हे मयासे न्ह्यःनेलाःथे याःगु दावी यानादिसें वय्कलं न्ह्यागु ख्यलय् नं फस्त लाइम्ह प्रधानमन्त्री डा. बाबुराम भट्टराई जम्बो मन्त्रिपरिषद् गठन यायेगुलिइ नं फास्ट जुल धकाः ध्याचू नकादिल । द्वन्द्वकालया मुद्दा लित कायेगु प्रक्रियाय् सरकारं गलत याःगु दु धयादिसें नेता गजुरेलं छगू छगू यानासिबें दलतय्गु सहमति फुक्क मुद्दा एक मुष्ट कथं हे लित कायेमाःगु खः धकाः न्ह्यथसें धयादिल 'बालकुष्णजीया मुद्दाय् सरकारं गाइजात्रा याःगु दु , थुकिं यानाः राष्ट्रिपतियात तकं विवादय् सालाःहःगु दु । विवादीत यानाः अलंकारिक राष्ट्रपतियात अधिकार कायेत बाध्य यायेगु स्थिति ब्वलंका ब्यूगु दु ।'

वय्कलं ७ बुँदाया सहमति कथं सेना समायोजनयात थःपिन्सं स्वीकार याये फैमखु धयादिसें ध्यबाया नितिं थःपिन्सं विरोध यानाः च्वनागु मखु धकाः स्पष्ट यानादिल । वय्कलं धयादिल 'अन्मिनं समायोजनया नितिं योग्य ठहर याःपिं फुक्कसित समायोजन यायेमाः, ध्यबा छगः हे मकाःसां जिउ ।' लडाकुया सुपि्रम कमाण्डर प्रचण्ड व प्रधानमन्त्रीं अपमानीत कथं लडाकु समायोजन यायेगु सहमति यात धयादिसें उकियात भिंकेगु ज्या मयायेकं न्ह्याः वने फैमखु धकाः धयादिल । अथे हे नेता गजुरेलं थःपिन्सं शिविरय् दुपिं लडाकूतय्त अपमानित कथं समायोजन जूमवनेत निर्देशन यानागु खः धकाः नं धय।दिल ।