'लुमन्ति दबू' पौया चिखिफ्यनेज्या

लुमन्ति दबूया ग्वसालय् थौं छगू ज्याझ्वःया दथुइ नेपालभाषाया न्हूगु पौ "लुमन्ति दबू"या न्हापांगु ल्याःया चिखिफ्यनेज्या जुल ।

नेपालभाषा केन्द्रीय विभाग यलय् दबूया नायः प्रकाश शाक्यया सभापतित्वय् जूगु उगु ज्याझ्वलय् विभागीय प्रमुख प्रा. प्रेमशान्ति तुलाधरं "लुमन्ति दबू"या चिखिफ्यनेज्या यानादीगु खः ।

शंखधर साख्वाःया दिवसया लसताय् जूगु उगु ज्याझ्वलय् राष्ट्रिय विभूति शंखधर साख्वाःया बारे थी थी विद्वानपिन्सं थःथःगु नुगः खँ प्वंकादीगु खः । ज्याझ्वलय् शंखधर साख्वाःया बारे विभागया पुलांम्ह नायः सह प्रा. काशीनाथ तमोटं व नेपालसंवतया तिथिया बारे ज्योतिषिपं देवनारायण महर्जन, महेश्वर जुजु राजोपाध्याय व हरिनारायण मल्लपिन्सं न्वचू बियादीगु खः ।

दबूया छ्यांजे पूर्ण श्रेष्ठं लसकुस यानादीगु उगु ज्याझ्वलय् प्रा. प्रेमशान्ति तुलाधर, सह प्रा. डा. चुन्दा बज्राचार्य, सह प्रा. तुलसीलाल सिंहं नं नुगःखँ प्वंकादीगु खः ।

लुमन्ति दबू नेपालभाषा स्नातकोत्तर तिगं ब्वनादीपिं ब्वँमिपिन्सं नीस्वनातःगु नेपालभाषाया संस्था खः ।

More Stories Like this