भाषाथुवाः पुष्परत्न 'सागर' मंत

येँ(सन्ध्या टाइम्स)/नेपालभाषा व्याकरणविद्, प्रेस व्यवसायया न्ह्यलुवा व पुलांम्ह ल्हासा नेवाः व्यापारी पुष्परत्न 'सागर' (तुलाधर) म्हिगः मंत। ताःई न्ह्यवंनिसें उसाँय् मदयाच्वंम्ह वय्कः ९० दँ दुम्ह खः।
ने.सं. १०४२ सालय् असं धालसिक्वय् बूम्ह वय्कः ल्हासा व्यापारया झ्वलय् खुदँ तक ल्हासाय् च्वनादीगु खःसा व स्वयां न्ह्यः तःदँ तक भारतया कलकत्ताय् च्वनादीगु खः। ल्हासां ने.सं. १०७० सालय् नेपाः लिहां वयाः मेपिं ल्हासा नेवाः पासापिं लिसे जानाः नेपाल प्रेस चायेकूगु खः।
नेपालभाषाया न्हापांगु लय्पौ 'थौंकन्हे' या वय्कः उपसम्पादक खःसा वय्कलं 'सुवोध नेपालभाषा व्याकरण', 'नेपालभाषाया मौलिक शव्दकोष' सफू च्वयादीगु दु। वय्कलं नेपाल लिपिया लेटर प्रेस आखः व टाइप राइटर नं दयेकादीगु खः।
नेपालभाषा परिषद्पाखें नेसं १०७७ य् वय्कःयात 'भाषाथुवाः' उपाधिं विभुषित याःगु खः। वाणिज्यया ख्यलय् वय्कलं नेपाली वाणिज्य संघ ल्हासाया कान्तिपुर कचाया छ्यांज्ये जुयाः नं ज्या यानादीगु खः।