विज्ञ पुचःया ज्या छु? थ्व निं स्पष्ट जुइमाः

राज्य पुनर्संरचना सम्बन्धी समस्या ज्यंकेगु लागिं छगू आयोग हे गठन यानाः ज्या यायेगु धकाः अन्तरिम संविधानय् उल्लेख जुयाच्वंगु खःसां आः उकिया पलेसा विज्ञतय् पुचः जक गठन यानाः ज्या याकेगु खँ पिहां वःगु दु। तर विज्ञ पुचःयात यक्व अधिकार बियाः संविधानसभाया राज्य पुनर्संरचना सम्बन्धी समितिं पारित हे याना तयेधुंकूगु प्रतिवेदनयात समेत उल्टे यायेगु कथंया कुतः जूगुलिं जनजाति व मधेसी सभासदतय्सं उकिया विरोध याःगु दु। शुक्रवाः छन्हुं हे संविधान संशोधन यानाः पुचः गठनया ज्या समेत यायेगु धकाः जूगु तयारीयात जनजाति व मधेसी सभासद्तय्सं विफल याना बिल। खतुं वकुन्हु यदि संविधान संशोधनया प्रस्ताव वःगु जूसा जनजाति व मधेसी सभासद्तय्सं ह्वीप उल्लंघन यानाः रोष्टम समेत घेरे यायेगु धकाः ग्वसाः दयेकेधुंकूगु खः। तर माओवादी नेता देव गुरुङं आःयात थ्व ज्या स्थगित यायेमाली धकाः तःगु प्रस्तावयात स्वीकार यानाः कार्यसूची लित काःगुलिं मेगु बबाल जुइ मलात।
आः गठन यायेत्यंगु विज्ञ पुचःया ज्या छु जुइ धइगु खँ उकिया गठन न्हयः हे स्पष्ट जुइमाः। संविधानसभाया थ्वहे सम्बन्धी ज्या याइगु समितिं क्वचायेका तयेधुंकूगु ज्यायात विज्ञ पुचलं खारेज याये दइ मखु। संविधानसभाया राज्य पुनर्संरचना समितिं गुगु प्रतिवेदन तयार याःगु खः उकियात ग्वाहालि यायेगु हे जक थ्व पुचःया ज्या जुइमाः। राज्य पुनर्संरचना नेपाःया राजनीतिक निर्णय खः। आः थ्व निर्णययात उल्टे यायेगु मखु, थुकियात ग्वाहालि यायेगु ज्या जक जुइमाः। निर्वाचित प्रतिनिधितय्सं याना तयेधुंकूगु ज्यायात विज्ञया नामं खारेज यात धाःसा व स्वीकार्य जुइ मखु।

More Stories Like this