बस छगलं खुसिइ कुतुं वनाः छम्ह मंत

येँ(सन्ध्या टाइम्स)/बाह्रेबिसें येँय् वयाच्वंगु छगः यात्रुबाहक बस थौं सुथय् सुनकोशी खुसिइ कुतुं वनाः छम्ह यात्रु सीगु दु। विपरित दिशां वयाच्वंगु मोटरसाइकलयात ठक्कर नकाः बस खुसिइ कुतुंवंगु खः। बा. २ ख ६२५९ नम्बरया उगु बस अरनिको राजमार्ग अन्तर्गत सिन्धुपाल्चोकया सुकुटे धइगु थासं खुसिइ कुतुं वंगु खः। बसय् करिब ४० म्ह यात्रु च्वना वःगु खःसां दुर्घटनाय् लानाः १९ म्ह जक घाःपाः जुल। बाह्रेबिसेपाखे वनाच्वंगु बा. ४६ प ८२२२ नम्बरया मोटरसाइकलयात बचे यायेगु कुतः यायां हे ठक्कर नकाः बस कुतुं वंगु खः।