मनहरा खुसिया धाः हीकेत्यंगु विरोधय् प्रदर्शन

येँ(सन्ध्या टाइम्स)/गोठाटार व नगदेश दथुइ च्वंगु मनहरा खुसि हीकेगु कुतः याःगु विरोधय् थौं येँ जिल्ला प्रशासन ज्याकू पिने नगदेशया स्थानीयवासीतय्सं नाराबाजी यासें प्रदर्शन यात।
मनहरा खुसिइ ताँ दयेकेगु ज्या जुयाच्वंगु थासय् गोठाटारवासीतय्सं उगु खुसियात २०२१ सालया नापी न्ह्यःया अवस्थाय् यंकेमाः धकाः म्हिगः डोजर हयाः खुसि हीकेत्यंगु इलय् नगदेशया स्थानीयवासीलिसे ल्वापु जूगु खःसा थौं निगू पक्ष दथुइ येँया जिल्ला प्रशासन ज्याकुथी वार्ता जुयाच्वंगु खःसा पिने नगदेशया स्थानीय मनूतय्सं प्रदर्शन यानाच्वंगु खः।
वार्ताय् ख्वप जिल्ला प्रशासनया प्रतिनिधि नापं मध्यपुर थिमि नगरपालिकाया प्रतिनिधितय्सं नं ब्वति कयाच्वंगु दु। सलंसः नगदेशवासीतय्सं प्लेकार्ड तकं ज्वनाः मनहरा खुसियात आः गुगु अवस्थाय् दु वहे अवस्थाय् तयाः ताँ दयेकेमाः, खुसि हीके दइ मखु धकाः माग यानाच्वंगु दु। उगु ताँ दयेकेत सरकारं बजेट नं फ्याये धुंकूगु दु।
म्हिगः खुसिया विषययात कयाः ल्वापु जूगु इलय् गोठाटारया मनूत पञ्चेबाजा ज्वनाः निगः डोजर सहित वःगु खःसा नगदेशवासीतय्सं नं धिमे थानाः सतकय् कुहां वयेत आह्वान याःगु खः।