भन्ते अश्वघोष व कुमार काश्यपया मंकाः अभिनन्दन

येँ (सन्ध्या टाइम्स)/भिक्षु अश्वघोष महास्थविर खुम्हम्ह संघनायक जुयाबिज्याःगु व भिक्षु कुमार काश्यप महास्थविर संघउपनायक जूयाबिज्याःगु लसताय् म्हिगःआनन्दकुटी विहारय् अखिल नेपाल भिक्षु महासंघपाखेंछगू तःजिगु ज्याझ्वः यासें वसपोलपिंत मंकाः अभिनन्दनयात। ज्याझ्वलय् मूपाहां संविधानसभाया अध्यक्ष सुवासचन्द्र नेम्बाङं वसपोलपिंत अभिनन्दनपौ लःल्हानादीगु खः।ज्याझ्वलय् न्ववासें नेम्वाङं लुम्बिनीइ गुरुयोजनाया ३० प्रतिशत ज्या तकं पूवंके मफुगुलिं बुद्ध जन्मभूमि लुम्बिनी सुरक्षित यायेमाःगुबिचाः प्वंकादिल। वय्कलं आः दयेकीगु संविधानय् धर्म निरपेक्ष नेपाः उल्लेख जुइगु खँ नं कनादिल।
अभिनन्दित संघनायक भिक्षु अश्वघोष महास्थविरं थौंया राजनैतिक नेतातय्केपूर्वाग्रह दुगुलिं हे शान्ति स्थापना मजूगु खः धासें अज्याःगु पूर्वाग्रह त्वःतल धाःसा अथें हे शान्तिया लुखा चाला वनी धयाबिज्यात।
अथे हे संघउपनायक भिक्षु कुमार काश्यपं देय्या हरेक क्षेत्रय् वःगु सुख शान्तिं म्वायेगु हे हरेक मनूया मू इच्छा खः धासें सकसिनं थःथःगु तरिकांराष्ट्रिय भावना तयाः संविधान च्वयेगु स्वयेमाः धयाबिज्यात।
ज्याझ्वलय् नेपाःया निंतिं श्रीलंका, थाईल्याण्ड व म्यानमार राजदूतावासया प्रतिनिधिपिंसं नं भिंतुना न्वचु बियादीगु खः।
समारोह येँया ख्वीनिगू, यलया नीछगू, ख्वपया च्यागू, भ्वतँया न्यागू, त्रिशुलिया निगू, बुटवलया स्वंगू, तानसेन-पाल्पाया झिंछगू, लुम्बिनीया निगू व पोखराया छगू विहारलिसें थीथी संघसंस्थात जानाः मंकाः रुपं तयार यानातःगु अभिनन्दनपौया लिसें थीथी द्वहलपा नं वसपोलपिंत लःल्हाःगु खः।
ज्याझ्वलय् नेपाल बुद्धिष्ट फेदरेसनया नायः, नेपाल बज्रयान महासंघया नायः नापं आपालं भिक्षुभिक्षुणी, उपासक उपासिका व थीथी बौद्ध संघ संस्थाया दुजःपिनि उपस्थिति दुगु खः।
अखिल नेपाल भिक्षु महासंघया नायः भिक्षु बोधिसेन महास्थविरया अध्यक्षताय् न्ह्याःगु उगु ज्याझ्वलय् भिक्षु संघरक्षितं लसकुस यानाबिज्यागु खःसा संघनायक भिक्षु अश्वघोष महास्थविरपाखें शिल प्रार्थना जूगु खः।