भट्टराईया दावीं विपक्षी तम्वल

प्रमयात भारतं बियातःगु आश्वासन थुइकेत थापाया प्रयोग
येँ(सन्ध्या टाइम्स)/प्रधानमन्त्री डा. बाबुराम भट्टराईनं थःगु नेतृत्वय् दुगु वर्तमान सरकार हे राष्ट्रिय सरकार जुइ धकाः यानादीगु दावीं विपक्षी पार्टी एमाले व नेपाली कांग्रेस तम्वःगु दु। सूत्रतय्सं धाः कथं प्रम भट्टराईनं यदि राष्ट्रिय सरकार गठन यायेगु लागिं राजीनामा बियाः लुखा चायेका मबिल धाःसा वय्कःयात गय् यानाः चीकेगु धइगु खँयात कयाः एमाले व कांग्रेस नेतातय् दथुइ खँल्हाबल्हा तकं सुरु जुइधुंकूगु दु।
सूत्रया कथं प्रम भट्टराईनं थःगु सरकार हे राष्ट्रिय सरकार खः धकाः दावी यानाच्वंगु धइगु भारतया समर्थन दयाः हे खयेमाः धइग अनुमान यासें वय्कःयात भारतं गज्याःगु आश्वासन बियाहःगु खः सीकेगु लागिं विपक्षी दलतय्सं कुतः यानाच्वंगु दु। थुकिया लागिं एमाले व कांग्रेस नेतातय्सं भारतलिसे बांलाःगु स्वापू दुम्ह पुलांम्ह पञ्च नेता सूर्यबहादुर थापायात लगे यानाच्वंगु खँ नं सीदुगु दु। भट्टराईयात राष्ट्रिय सरकार गठनया तकं आश्वासनं भारतं बियातःगु खः लाकि मखु धकाः सीकेत थापाया सूत्रं प्रयोग याकेत्यंगु खँ सूत्रं धाःगु दु।
मेखे प्रधानमन्त्री भट्टराईनं थःत मधेसवादी पार्टीतय्गु समर्थन दत्तले सुनां नं क्वःथले फइ मखु धासें यदि थःगु नेतृत्वय् राष्ट्रिय सरकार गठन मयायेगु खःसा राजीनामा बी मखु धइगु सन्देश कांग्रेस व एमालेयात छ्वयेधुंकूगु खँ नं सूत्रं धाःगु दु।
प्रचण्डया प्लेन सर्गतय् चाःहिलाच्वन
न्युयोर्क भ्रमणं थौं नेपाः लिहां वयेमाःम्ह माओवादी अध्यक्ष प्रचण्ड च्वना वःगु विमान त्रिभुवन विमानस्थलय् ल्याण्ड याये मफयाः सर्गतय् तुं चाःहिका तःगु खँ सीदुगु दु। मौसम खराब जुयाः त्रिभुवन विमानस्थलय् थौं सुथंनिसें छगः हे विमान दिके मफयाः सर्गतय् तुं 'होल्ड' जुयाच्वंगु खःसा उकी वय्कः च्वना वःगु विमान नं लाःगु खः। न्हिनय् १२.३० बजे ल्याण्ड जुइमाःगु वय्कःया विमान १.३० बजे तक दिके मफुनि।