एमालेयाके म्याण्डेट ग्व

सम्पादकजु,

थौंकन्हय् नेपाःया राजनीतिक अवस्था अतिकं भ्वाभ्वः जुयाच्वंगु दु । थुकिया लबः कायेगु कथं एमाले धाःपिंसं आः सरकार गठन यायेगु म्याण्डेत एमालेयाके जक दु धकाः सरकार गठन याःगु दु । धाथें छु एमाले व नेपाली कांग्रेसयाके सरकार दयेकेत जनतायागु म्याण्डेट दु ला छु ल्याखं थौं हरुवा पार्टीया नेतात जनताया म्याण्डेट दु धकाः हाला जूगु धाथें सरकार नीस्वनेगु जनताया म्याण्डेट धयागु ला नेकपा माओबादीयात बिउगु खःनि । प्रत्यक्ष निर्वाचनपाखें संविधानसभाय् मुक्कं सच्छि व नीस्वंगू निर्वाचन क्षेत्रय् त्याकूगु खः । नेपाली कांग्रेस व एमाले धाःपिंसं ला चुनावय् थःके दुगु सिट स्वयां म्हो जक अझ ला बछि स्वयां म्हो जक ल्यंकेफुगु खः । नकचरा नेतात गथे जुयाः जनताया म्याण्डेट दत जनताया मिखाय् धू जुयाः वनेधुंकल थुपिं राजनीतिक पार्टीत । म्हिगः तिनि नीस्वंगु मधेशी फोरमं थ्यंमथ्यं सुइगू सिट त्याकल बरु सरकार नीस्वनेगु जनताया म्याण्डेट फोरमयाके दु । इतिहास दगु राजनीतिक पार्टी धकाः बय्बय् यानाच्वंगु नेपाली कांग्रेस व एमालें थ्व नं बांलाक स्वयादिसँ एमाले धाःपिंसं स्वनिगःयात थःगु लालकिल्ला धकाः घोषणा याना जूपिं वंगु संविधानसभा चुनावय् ध्वंया छ्यनं न्यकू गायब जू थें स्वनिगःपाखें तनावन । हा हे मदयेक पुनाबिलसा आः वहे नेकपा एमालें सरकार दयेकेगु जनताया म्याण्डेट थुमिके हं । स्व प्रधानमन्त्री जुइम्हेसिगु ख्वाःपाः । वंगु चुनावय् निथासं निथासं बूम्ह माकुने हे प्रधानमन्त्री जुल । प्रधानमन्त्रीया 'प्र' तकं उच्चारण याये मल्वः व पाँय्म्वह मार्का माकुनें । धाथें ला एमाले धाःपिंके नैतिकता धयागु छुं हे मदयेधुंकल जुइमाः जनताया मतयागु छुं कदर दु ला मखुसा चुनावं बूपिंया बूपिं मू नेतात जक मुनाः सरकार स्वनेगु जनताया म्याण्डेट जिमिके दु धइगु न्हाय् ध्यनाः सर्गः स्वयेगु मखा ? कि एमालेतय्त न्हासय् लुफिं हाःगु अझं मगाःनि ?

शरण 'राम’ ताहाचः, येँ

More Stories Like this