''नेतातय्त मुद्दा तयाबिइ"

येँ (झीगु स्वनिगः)

एकीकृत नेकपा -माओवादी)या ओखलढुंगां थःपिनि नेता बालकृष्ण ढुंगेलयात आममाफी मबिल धाःसा मेमेगु पार्टीया नेता व कार्यकर्तात विरुद्ध नं मुद्दा दयेकगु ख्याच्वः ब्यूगु दु । एकीकृत माओवादीया ओखलढुंगा जिल्ला संगठन समितिं म्हिगः शनिवाः येँय् पत्रकार सम्मेलन यानाः मेमेगु पार्टीया नेता व कर्याकर्तातय्त नं मुद्दा तयाबिइ धकाः अथे ख्याच्वः ब्यूगु खः । एकीकृत माओवादीया केन्द्रीय ज्याकू पेरिसडाँडाय् याःगु पत्रकार सम्मेलनय् माओवादी ओखलढुंगाया सेक्रेटरी राजकुमार कार्कीं उज्जन कुमार श्रेष्ठं जनयुद्ध व जनविरोधी ज्या याःगुलिं पार्टीं हे सफाय याःगु खः धासें शान्ति प्रक्रिया विरोधी तत्वं आः षडयन्त्र यानाच्वंगु दु धकाः धयादिल ।

माओवादीया किराँत राज्य समितिया छ्याञ्जे एस के हिमालं पार्टीया शीर्ष नेतृत्वयात फसेयायेगु षडयन्त्र जुयाच्वंगु नापं मानव अधिकारवादीतसें यकःति कथं ढुंगेलया मुद्दायात कयाः म्वाःमदुगु कथं प्रचार प्रशारण यानाच्वन धकाः नं द्वपं बियादीगु दु । सरकारं माओवादीया सांसद् ढुंगेलयात गुगु कथं सर्वोच्च अदालतं फैसला न्यंकल व धैगु राजनीतिक प्रकृतिया घटना खः धकाः न्ह्यथसें आम माफि बिइत राष्ट्रपतियाथाय् पौ छ्वये धुनेवं हे प्रतिपक्ष राजनीतिक दलया कार्यकर्ता व नेतातय्सं विरोध यानाः उगु मुद्दायात झन झन चर्के यानाः वयाच्वंगु दु । संविधानय् हे सरकारं आम माफिया नितिं राष्ट्रपतियाथाय् छ्वये फैगु ब्यवस्था यानातःगु दु ।