जनमतया कदर ग्व

संविधानसभाया चुनावय् पराजित एमालेया नेता माधव कुमार नेपाल संघीय लोकतान्त्रिक गणतन्त्र नेपाःया प्रधानमन्त्री जुल । नेपाली कांग्रेसया सभापति गिरिजाप्रसाद कोइरालाया धापू कथं सहमति सहकार्य व एकताया लागि जूगुलिं थुकी त्याः बूया खँ वइ मखु ।

नेपाः संघीय लोकतान्त्रिक गणतन्त्र जूसां जनमतया कदर मजू । पार्टी दुने जुइगु नेतातय्गु गुटबन्दी व व्यक्तिगत स्वार्थं यानाः नेपाली जनताया निर्णययात अस्वीकार यायेगु ज्या जूगु दु । थःगु स्वार्थ व सत्ताया लागिं जनताया निर्णययात अपमान यानाच्वंगु दु । संविधानसभाया चुनावय् जनतां अस्विकार याःम्ह माधव नेपालयात प्रधानमन्त्री यायेगु धइगु जनताया निर्णययात तप्यंक हे अस्वीकार यायेग खः । यदि राजनीतिक पार्टीतय्सं जनताया मतयात कदर मयायेगु खःसा कोटी कोटी दां फुकाः चुनाव यायेमाःगु हे छाय् जनताया निर्णययात अवमूल्यन यानाः नेपाःया राजनैतिक पार्टीतय्सं निरंकुश पाचायती व्यवस्था स्वयां नं क्वह्यंगु ज्या याःगु दु ।

न्हूगु नेपाः निर्माण यायेगु धकाः वँय् हाःथें हालाच्वंपिं नेतातय् नैतिकता धाःसा छफुति हे मदुगु जुयाच्वन । थुमिसं यानाः हे नेपाःया दुर्गति जुयाच्वंगु खः । थःगु पक्षय् जुल कि संवैधानिक थःगु पक्षय् मजुल कि असंवैधानिक धाईपं नेतातय्सं यानाः नेपाः थौंकन्हय् विश्वय् लिउने लानाच्वंगु खः । संविधानसभाया चुनावय् थःगु पार्टी बांमलाक बुइवं नैतिकता क्यनाः पार्टी महासचिव पदं राजीनामा बिउम्ह माधव नेपालं प्रधानमन्त्री जुइगु अवसर वयेवं धाःसा नैतिकतायात बागमतिइ चुइका छ्वत ।

नेपालय् नेता जुइग धइगु देश व जनताया ज्या यायेत मखसें सत्ता प्राप्तीया लागिं जक खः धइगु खँ नेतातय्सं हानं छक्वः पुष्टि यानाबिल । थौंकन्हय् नेपाःया स्थिति धइग संक्रमणया स्थिति खः । देशय् शान्ति सुरक्षा व्यवस्थित यायेगु अले संविधान निर्माण यायेगु आःया मू एजेन्डा खः । देया राजनीति धाःसा सत्ता प्राप्त यायेगुलिं हे चाःचाः हिलाच्वंगु दु ।

जाँचय् फेल जूम्ह विद्यार्थीयात न्हापांगु सिरपाः बी थें संविधानसभाया चुनावय् पराजित माधव नेपालयात प्रधानमन्त्री ला यात । तर थ्व सरकारया स्थायित्व गुलि कांग्रेसया सभापति गिरिजाया आशिर्वादं माधव नेपाल प्रधानमन्त्री ला जुल आः गनं थ्व सरकार कांग्रेसया कठपुतली जकं जुइगु मखु ला थ्व सरकारया लगाम ला कांग्रेसयाके खः । उकिसनं सरकारं माओवादी लागयत सकसितं कःघानाः यंके फइ कि मफइ जनताया इच्छा कथं क्वःछिना तःगु इलय् संविधान दयेके फइ ला कि मफइ सुरक्षा कायम याइ कि मयाइ अभाव भ्रष्टाचार महङ्गी आदियात नियन्त्रण याइ कि मयाइ वला स्वये हे ल्यं दनि । आःयात ला भाजु नेपालया प्रधानमन्त्री जुइगु न्हापांनिसेंया इच्छा निं पूवंगु दु तर वय्कःया न्ह्यःने यक्व हे हाथ्यात दु ।

कांग्रेसं मेगु पार्टीया सरकारयात पुवंक चले याके बिउगु इतिहास मदु । २०५१ या मध्यावधि चुनाव लिपा नं कांग्रेसं एमालेयात समर्थन यानाः सरकार चले याकूगु खः । तर अबलय् गुला तक जक एमालें सरकार चले याये खन । गुला लिपा कांग्रेसं समर्थन लित कयाः थःगु नेतृत्वय् सरकार चले यात । आः नं वहे अवस्था मवइ धाये फुगु स्थिति मदु । संविधानसभाया चुनावय् बूगुलिं कांग्रेस थम्हं सरकारया नेतृत्व याये मखनाः छटपट जुयाच्वंगु दु । आः एमालेयात सरकारं दयेके बियाः न्याला खुला लिपा न्हापा थें समर्थन लित कयाः हिस्स यायेत बेर मदु । सत्ता समीकरण पार्टी दुने गुटबन्दी सत्ताया भागबन्दी नेतातय्गु व्यक्तिगत स्वार्थ अहंकार थुकी हे थौंकन्हय्या राजनीति तक्यनाच्वंगु दु । नेपाःया विडम्बना धइगु हे थ्व खः । नेपाः थथे हे जुया न्ह्याः वनाच्वन धाःसा देय्या प्रगति गबलय् जुइ ?

नरेन्द्र मान श्रेष्ठ 'गोगंजु’

More Stories Like this