सभामुखयात नेवाःतय्पाखें ज्ञापनपत्र
संसदं गठन यायेत्यंगु राज्य पुनर्संरचना सम्बन्धी विज्ञ पुचःया प्रतिवेदन अन्तिम जुइ मजिउ व उकियात संसदया राज्य पुनर्संरचना तथा राज्य शक्ति बाँडफाँड समिति मार्फत अनुमोदन याकाः जक पारित यायेमाः धासें नेवाः स्वायत्त राज्य मंकाः संघर्ष समितिं थौं सभामुख सुभाष नेम्बाङयात छगू ज्ञापनपौ लःल्हात ।
संघर्ष समितिया वर्तमान नायः सुजीव वज्राचार्यं लःल्हाःगु उगु ज्ञापनपत्रय् विज्ञ पुचलय् जाति भाषा विरोधीत तये मजिउगु, जाति भाषा आन्दोलनकारीत तयेमाःगु, समितिया अवधि चीधं यायेमाःगु माग नं याना तःगु दु ।
ज्ञापनपौ लःल्हाना कासें सभामुख नेम्बाङं थ्व सुझाव कायेत जक गठन यायेत्यंगुलिं जूगुलिं उकिया प्रतिवेदन अन्तिम मजुइगु व संविधानसभाया दुई तिहाई बहुमतं जक थुकियात पारित याये फइ धयादिल। अय्नं थुकी चिउताः तःगु बांलाः धासें वय्कलं थुकिं यानाः दलतय्त सजग याइगु व दलतय्सं हे थुकियात समाधान याइ धइगु बिचाः नं प्वंकादिल ।
उगु इलय् संघर्ष समितिया दुजःपिं, थीथी पार्टीया नेवाः सभासद्तय्गु नं उपस्थिति दुगु खः ।
