थौं थक्वातय् जात्रा

येँ(सन्ध्या टाइम्स)/थौं कछलाथ्व पुन्हि। थौं सुथंनिसें येँया पश्चिमपाखे लाःगु ऐतिहासिक नेवाःतय्गु वस्ती थक्वाः अर्थात थानकोटय् जात्रा जुयाच्वंगु दु। जात्राया झ्वलय् महालक्ष्मी, गणेद्यः व भैरवया द्यःखः जात्रा याइगु चलन दु। अथे हे म्हिगः बहनी आदि नारायणया जात्रा जूगु खः। आदि नारायण द्यःयात स्वनिगःया दकलय् पुलांम्ह नारांद्यः धायेगु याः। थक्वाः जात्राय् अन च्वनाच्वंपिं सँय् अर्थात तामाङ व मगःतय्सं नं ब्वति काइ। थक्वाः गणेद्यःया पुजारी हे मगःत खः। थक्वाः शहर दुने सँय्त च्वनीगु बिस्कं 'सँय् गां' दु। थौं सुथंनिसें जुयाच्वंगु जात्राया झ्वलय् थौं बहनी जुइवं द्यः त्वाय् चिंकीगु चलन दु।