न्ह्यागु हे याःसां राष्ट्रपति विवादय्

बालकृष्ण प्रकरण
येँ(सन्ध्या टाइम्स)/हत्याया द्वपं लानाच्वंम्ह माओवादी सभासद् बालकृष्ण ढुंगेलयात माफी बीगु लागिं सरकारं याःगु सिफारिस पारित यायेगु वा मयायेगु धइगु खँयात कयाः राष्ट्रपतियात दवाव लाःवंगु दु। उगु सिफारिस पारित याःसां वा मयाःसां नं राष्ट्रपति विवादय् लाइगु खतरा अप्वया वःगु दु।
यदि राष्ट्रपतिं सिफारिस स्वीकार यात धाःसा वय्कलं जनदवावयात बेवास्ता याःगु ठहर जुइसा मयात धाःसा थःके मदुगु अधिकार प्रयोग याःगु ठहर जू वनी। खतुं राष्ट्रपति रामवरण यादवं थ्व सिफारिसयात थम्हं सामान्य प्रक्रियाय् यंके मखु धकाः बचं बियादीधुंकूगु खँ वय्कःयात म्हिगः नापलाः वंम्ह बार एशोसियसनया अध्यक्ष प्रेमबहादुर खड्कां कनादीगु दु। लिसें खड्कां राष्ट्रपति संविधानया संरक्षक जूगुलिं वय्कलं थ्व सिफारिसयात पने हे माः धकाः नं दावी यानादीगु दु।
उखे माओवादी सभासद् लिसें कानूनविद् खिमलाल देवकोटां सरकारं याःगु सिफारिसयात स्वीकार यायेगु बाहेक राष्ट्रपतियाके मेगु विकल्प हे मदु धयादीगु दु। यदि राष्ट्रपतिं थुकी उखेथुखे यात धाःसा वय्कः हानं विवादय् लाइगु ख्याच्वः नं देवकोटां बियादिल।
माओवादीया केन्द्रीय दुजः गंगा श्रेष्ठं धाःसा थ्व न्हापा जनयुद्धया इलय् पार्टीया हे निर्देशन कथं जूगु घटना जूगुलिं थुकियात आः ल्ह्वनाच्वन धाःसा थुकिं देशय् शान्ति कायम यायेगु ज्याय् हे पंगः वइगु बिचाः प्वंकादीगु दु।