विज्ञ पुचः दयेके मबीत थौं नाराबाजी व रोष्टम घेराउ

जनजाति सभासद्तय्सं पार्टी ह्वीप उल्लंघन याइगु

येँ (सन्ध्या टाइम्स)/राज्य पुनर्संरचना सम्बन्धी ज्या न्ह्यःने न्ह्याकेत थौं संविधान संशोधन यानाः विज्ञ पुचः गठन यायेगु धकाः न्ह्याकूगु ज्यायात संविधानसभाया जनजाति व मधेसी सभासद्तय्सं विरोध याइगु जूगु दु। उगु पुचः गठन यायेगु लागिं थौं न्हिछिया दुने हे संविधानसभा व संसदया स्वंगू चरण तक बैठक च्वनेगु धकाः दयेकातःगु कार्य तालिका खारेज यासें गठनया ज्या लिछ्यायेत माग यासें संविधानसभाय् दुथ्याःपिं जनजाति व मधेसी सभासदतय्सं माग यायेगु तयारी याःगु दु। थौं सःतातःगु संसद बैठकय् उगु एजेण्डा प्रवेश जुइवं हे जनजाति व मधेसी सभासद्तय्सं आःयात थ्व ज्या लिछ्यायेमाल धकाः इनाप यायेगु व अनं नं माने मजुल धाःसा रोष्टम घेरे यानाः जूसां संसद न्ह्याके मबीकेगु रणनीति दयेकूगु खँ सीदुगु दु। थःपिनि ज्याझ्वः बारे न्ह्यव जानकारी बीत थौं थीथी पार्टीया जनजाति व मधेसी सभासद्तय्सं सभामुखयात नापलानाः खँल्हाबल्हा नं याःगु दु। लिसें थौं संसदया जनजाति ककस व मधेसी ककस दथुइ नं सहलह जूगु दु। जनजाति व मधेसी सभासद् छथाय् च्वन धाःसा संसदया ५७ प्रतिशत ल्याः खाः वइ।
आः गठन जुइगु विज्ञ पुचःयात राज्य पुनर्संरचनाय् प्रदेशतय् ल्याः क्वःछीगु, उकिया नामाकरण यायेगु व उमिगु अधिकार क्षेत्र निर्धारण यायेगु तक अधिकार बीगु धकाः तयारी जुयाच्वंगु खँ सीदुगु दु। लिसें उगु पुचलं तयार याःगु रिपोर्टयात तप्यंक संविधानसभाय् पेश यायेगु धयातःगु दु। थथे यात धाःसा संविधानसभा अन्तर्गतया राज्य पुनर्संरचना समितियात बाइपास याइगु जूगुलिं विज्ञ पुचलं राज्य पुनर्संरचना समितियात माःगु प्राविधिक ग्वाहालि जक यायेगु अधिकार बीमाः धकाः माग याःगु दु ।