सार्क शिखर सम्मेलन न्ह्यात

कार्यान्वयनय् बहः बीमाः

येँ (झीगु स्वनिगः)

म्हिगःनिसें माल्दिभ्सया अड्डु नांया टापुइ दक्षिण एशियाली क्षेत्रीय सहयोग संगठन -सार्क)या झिंन्ह्यक्वःगु शिखर सम्मेलन म्हिगः विहीवाः निसें न्ह्याःगु दु । निन्हुतक्क न्ह्याइगु उगु सम्मेलनया न्हापांगु न्हिइ उलेज्या सत्रय् नेपाःया प्रधानमन्त्री डा. बाबुराम भट्टराईं नवानादीगु खः । नवायेगु भmवलय् प्रधानमन्त्री डा. भट्टराईं सार्क बैंक, प्राकृतिक प्रकोपया इलय् तत्कालिन उद्दार, सार्कया मूल्यांकन, बहुपक्षीय व्यवस्था व क्षेत्रीय मानव कार्ययोजना सम्बन्धी सहमति पत्रयात कयाः नुगः खा प्वंकादीगु खः । शिखर सम्मेलनय् गरिबी निवारण, आर्थिक सहकार्य, सार्क राष्ट्रतय्गु विकास कोष, खाद्य सुरक्षा नेटवर्क, ऊर्जा, जलवायु परिवर्तन लगायतयात कयाः छलफल जुइ ।

न्हू न्हूगु विषयलय् दुहांवनाः न्हून्हूगु ज्याभmवः दयेकेगु स्वयाः पुलांगु निर्णयतय्त कार्यान्वयन यायेगुपाखे सम्मेलनं ध्यानबी फयेमाः । सार्क राष्ट्रतय्गु दथुइ यक्को समस्यात नं दु । उगु समस्यायात यथावत तयाः सार्कया विकास सम्भव मदु । भारतं नेपाःया ६० गू थासय् सीमा अतिक्रमण यानातःगु दु, कालापानीइ भारतीय सेनाया ब्यारेक दु, भारतं सीमा क्षेत्रय् थःयत्थे निर्माण कार्य न्ह्याकेगु, सीमा क्षेत्रय् एसएसबी सेनां नेपालीतय्त जुयाच्वंगु ज्यादतिं सार्कयात कमजोर याइ । अथेहे भारतं बंगलादेशया ढाका बन्दरगाह वनेत -राधिकापुर) लापु नं थौंतक्क ब्यूगु मदुनि । सार्कया छगू राष्ट्र पाकिस्तान प्रति अमेरिकां बांमलाःगु मिखां स्वयेगु यानावयाच्वंगु दु । आतंकवादया केन्द्र कथं कयाः निकट भविष्यय् अमेरिकापाखें कार्यबाही न्ह्याकीगु सम्भावना दु ।

सार्क शिखर सम्मेलनं थुगु कथंया सम्भावनाया बारे नं खा न्ह्यायेमाःगु विज्ञतय्गु धापू दु । उलेज्या सत्रलिपा निन्हु खुन्हु थीथी प्रस्तावत पारित याइगु उगु शिखर सम्मेलनं न्हापाया निर्णयत गुलित कार्यान्वयन जुल धयागु खाय् मुख्य ध्यान बीमाः । न्हू न्हूगु निर्णय पारित यायेगु जुल धाःसा पुलांगु निर्णयात कार्यान्वयन याइगु सुनां ? न्ह्यसः दनावइगु अस्वभाविक मखु । सार्क राष्ट्रतय्गु दथुइ समानता व भाइचाराया स्वापूयात औपचारिकताय् लिकुंगु पलेसा व्यवहारिक रुप बीफुसा सार्क बल्लाइ । प्रत्येक देय्या समान अधिकार, समान हैसियत व समान महत्व दुगु यात सैद्धान्तिक मान्यताय् धालय् यायेमफुतले सार्क छगू दबू बाहेक मेगु जुइमफैगु स्पष्ट दु ।