लुम्बिनी विकासय् मुनया नेतृत्व

बुद्ध जन्मभूमि लुम्बिनीयात धार्मिक वा सांस्कृतिक जक मखु विश्व शान्तिया लागिं नं नमूना क्षेत्र दयेकेगु ताः तयाः न्ह्याकाच्वंगु अभियानया नेतृत्व कायेत संयुक्त राष्ट्र संघया महासचिव वान की मुनं स्वीकार यानादीगु समाचार पिहां वःगु दु। थ्व नेपाःया लागिं जक मखु विश्वया सम्पूर्ण शान्तिप्रेमितय् लागिं नं लसताया विषय खः। लुम्बिनी विकासया अन्तर्राष्ट्रिय अभियानया नेतृत्व राष्ट्र संघया महासचिवं कायेवं थ्व अभियानयात विश्वं हे तःधंगु तिबः बीगु जक मखु विश्वय् शान्ति स्थापना यायेगु लागिं हरेक तहया ज्या यायेत राष्ट्र संघ लिउने मलाः धइगु सन्देश नं थुकिं बीगु निश्चित दु ।

खतुं लुम्बिनी विकास व राष्ट्र संघया स्वापू थ्वहे न्हापांगु धाःसा मखु। थ्व स्वयां न्ह्यः सन् ८० या दशकपाखे लुम्बिनीयात विश्व शान्तिया मू स्थल दयेकेगु धइगु ताः तयाः राष्ट्र संघपाखें छगू बिस्कं निकाय समेत गठन याःगु खः। तर देशय् बहुदल वयेवं अज्ञात कारणवस लुम्बिनीयात राष्ट्र संघीय अभियानपाखें बिस्कं तयेगु ज्या जुल। वयां लिपा लुम्बिनीया विकास नं वाय्त्यः फ्वाय्त्यः जू वन। न नेपाः सरकारं छुं यात, न अन्तर्राष्ट्रिय ख्यःयात हे छुं याके बिल। आः नं लुम्बिनी विकासय् चीनया छगू संस्थां रुची तयेवं भारतं मिखा तग्वः याना हःगु खने दयाच्वन। लुम्बिनी छगू तःधंगु परियोजना जूगु कारणं नेपाः याकःचां उकी छुं याये मफइगु निश्चित दु। थ्व ज्याय् अन्तर्राष्ट्रिय ग्वाहालि कायेगु लागिं राष्ट्र संघया महासचिवं आः गुगु सहमति क्यनादिल, उकिं तःधंगु हे तिबः बीगु निश्चित दु। थ्व अभियानयात आः दिपाः मबिसे न्ह्याका यंकेमाः ।

More Stories Like this