चालकं न्ह्यलं ब्वाःगुलिं ट्याक्टर कुतुं वन

१८ म्ह तीर्थयात्री मंत

येँ (सन्ध्या टाइम्स)/बराह क्षेत्रय् जुयाच्वंगु मेलाय् ब्वति कायेत जनकपुरंनिसें वनाच्वंगु छगः ट्याक्टर दुर्घटना जुयाः उकी च्वना वंपिं झिंच्याम्ह मनू सीगु दु। सीपिं सकलें बराह क्षेत्रया धार्मिक मेलाय् वनेत्यंपिं तीर्थयात्रीत खः। सीपिं झिंच्याम्ह मध्ये झिंखुम्ह मिसापिं खःसा छम्ह मिजं व छम्ह मचा खः ।

ज. १ त ४५५३ नम्बरया उगु ट्याक्टर सुनसरी जिल्लाया भरौल गाविस-२ या झुम्का धाःगु थासय् थौं सुथय् ५.४० बजे मोरङ-सुनसरी सिँचाई आयोजनया मूल नहरय् कुतुं वंगु खः। सीपिं सकलें ट्याक्टरया लिउने च्वंगु ट्रेलरं ल्हानाः सीगु खः। दुर्घटनाय् लानाः सीपिं सकलें धनुषाया तारापट्टी सिर्सिया गाविसया वडा नं. ४ व ५ य् च्वंपिं खः। उकी लानाः घाःपाः जूपिं मेपिं न्याम्हेसित धरानया वीपी विज्ञान प्रतिष्ठानय् वासः याकातःगु दु। अथे हे नहरय् कुतुं वंपिं मेपिं स्वम्ह यात्रुत धाःसा अझं तनाच्वंगु दनि। तंपिंत मालेगु ज्या प्रहरीं यानाच्वंगु दु। सीपिं नं सकलें यात्रुतय् सनाखत जुइ फुगु मदुनि ।

सीपिं सकलें स्थानीय यादव व मुखिया थरयापिं खः। उपिं अप्वः यानाः छगू हे परिवारया कलाःभाःत, मांअबु लानाच्वंगु दु। दुर्घटना जूगुया कारण बारे धाःसा थीथी कथंया खँ वयाच्वंगु दु। गुलिस्यां सुथय् ट्याक्टर चले याना वःम्ह चालकं न्ह्यलंब्वाःगुलिं उगु दुर्घटना जूगु खः धकाः द्वपं बिउगु दु। ट्याक्टर दुर्घटना जुइवं चालक भोगेन्द्र यादव बेपत्ता जूगु दु। प्रहरीं वयात नं मालाच्वंगु दनि। अथे हे गुलिसिनं धाःसा लँ तसकं स्यंगुलिं आपाः जोल्टिन नयाः ट्याक्टरया लिउने च्वंगु ट्रेलर इन्जिनपाखें छुटे जुयाः नहरय् कुतुं वंगु खँ धाःगु दु। घटनास्थलय् निरीक्षण याः वंपिं प्रहरीतय्सं धाःसा सडक विभागं इलय् हे मर्मत यायेमाःगु उगु लँ दयेकेगु ज्या मयाःगु कारणं यानाः हे उगु दुर्घटना जूगु खँ धाःगु दु। दुर्घटना लिपा उगु सतक तुरुन्त हे दयेकि धकाः थौं तिनि निर्देशन जारी जूगु दु ।

यात्रु च्वना वःगु उगु ट्याक्टर वास्तवय् सामान ल्ह्ययेत छ्यलीगु गाडी खः। उकी करिब ४५ म्ह मनू च्वना वःगु खः। स्यंगु लँय् अप्वः मनू तयाः ट्याक्टर चले याना हःगुलिं उगु दुर्घटना जूगु खनेदु धकाः नं धाःगु दु। बराह क्षेत्रय् वंगु हरिबोधिनी एकादशिनिसें झिन्हु तक मेला लगे जुइ।
घटनास्थलय् उद्धारया लागिं स्थानीय मनूत नापं प्रहरी व सशस्त्र प्रहरी थ्यंकेधुंकूगु दु।