विज्ञ पुचः बारे नेवाःतय् सरोकार
येँ (सन्ध्या टाइम्स)/राज्य पुनर्संरचना बारे सुझाव कायेत संविधान सभापाखें विज्ञ पुचः दयेकेत्यंगु बारे येँ येँ सहलह यायेगु झ्वलय् संविधानसभाया नेवाः सभासद् व नेवाः स्वायत्त राज्य मंकाः संघर्ष समिति दथुइ म्हिगः बिचाः ब्याकेगु ज्या जुल। उगु सहलहया लिधंसाय् संघर्ष समितिपाखें नेवाःतय्पाखें कंस हे संविधानसभाया अध्यक्ष सुभाष नेम्वाङ्गयात छगू ज्ञापनपत्र नं लःल्हाइगु जूगु दु। उज्वःगु हे ज्ञापनपत्र थीथी राजनीतिक दलया नेतातय्त नं बीगु निर्णय जूगु दु ।
सहलहया झ्वलय् नेवाः सभासद्तय्सं आः दयेकीगु विज्ञ पुचःपाखें संविधानसभाया राज्य पुनर्संरचना समितिपाखें दयेका तयेधुंकूगु आधारभूत सिद्धान्त व नक्सायात गुगुं नं कथं हीकीगु ज्या मजुइमाःगु खँय् सः तःगु खः। विज्ञ पुचःया ज्या प्राविधिक कथं पाय्छि मजूगु प्रदेशया सिमानायात भिंकेगु, अनया अधिकार व श्रोतया ब्यवस्थापन सम्बन्धी समस्या ज्यंकेत सुझाव बीगु जक जुइमाः धकाः नं सभासद्तय्सं बिचाः तःगु खः ।
प्रदेशया ल्याः व नां तयेगु ज्या मूलतः राजनीतिक जूगुलिं प्रस्तावित झिंप्यगू प्रदेशया ल्याः व नांयात उखे थुखे यायेगु अधिकार विज्ञ पुचःयात बी मजिउ धासें वय्कःपिंसं विज्ञ पुचलय् दुथ्याइपिं सकलें मनोनित जुइगुलिं उमिसं न्ह्यागु हे सुझाव बिउसां राज्यपुनर्संरचना समितिं पारित याःसा जक उकियात लागू यायेगु जुइ धकाः नं धयादिल। वय्कःपिंसं विज्ञ पुचलय् संघीयता, गणतन्त्र, जातीय स्वायत्तता, स्वशासन स्थापनाया आन्दोलनय् सक्रिय जुयाच्वंपिं मनूत तयेमाः धकाः नं माग याःगु दु ।
सहलह मुँज्याय् नवनियुक्त राज्यमन्त्री दिलीप महर्जन, महान्यायाधिवक्ता मुक्ति प्रधान, सभासद्पिं हिसिला यमि, हितमान शाक्य, डा. मङ्गलसिद्धि मानन्धर, ध्यानगोविन्द रंजित, बुद्ध साय्मि, रामकृष्ण चित्रकार, राजकाजी महर्जन, उमा कपाली, सत्यलाल मूल व महालक्ष्मी श्रेष्ठपिंसं ब्वति कयादीगु खः ।
