ओबामा नाप लायेगु प्रचण्डया कुतः ताः मलाःनि
येँ (सन्ध्या टाइम्स)/लुम्बिनी विकासया लागिं न्युयोर्क भ्रमणय् वनाच्वंम्ह माओवादी अध्यक्ष प्रचण्डं अमेरिकी राष्ट्रपति बाराक ओबामायात नं नाप लायेत यानाच्वंगु कुतः अझं ताःलाःगु मदुनि। वय्कलं राष्ट्र संघया महासचिव वान की मुनयात नापलानाः लुम्बिनी विकासया बारे चर्चा यानादीसां थ्वहे मौकाय् अमेरिकी राष्ट्रपति ओबामायात नं नापलायेगु लागिं कुतः यानाच्वंगु खँ सीदुगु दु। तर ओबामां धाःसा वय्कःयात ई बियाच्वंगु मदु ।
प्रचण्ड लुम्बिनीया नेता मखु: सुजाता
लुम्बिनी विकासया नामय् माओवादी अध्यक्ष प्रचण्ड अमेरिका भ्रमणय् वनाच्वंगु इलय् थुखे नेपालय् धाःसा नेपाली कांग्रेसया नेतृ सुजाता कोइरालां प्रचण्डं लुम्बिनीया नामय् राजनीति यानाच्वंगु द्वपं बियादीगु दु। थौं सुथय् सुनसरीइ पत्रकारतलिसे खँ ल्हासें वय्कलं लुम्बिनी विकासया ज्याय् प्रचण्डयात नेता माने यायेत थः तयार मदुगु खँ नं कनादिल। लिसें कांग्रेसया नेता डा. मिनेन्द्र रिजाल प्रचण्ड नाप अमेरिका वंगु खँयात नं वय्कलं विरोध यानादिल ।
