'मंसिर तक सुं हे सांसद पिहां वने मते'
येँ (सन्ध्या टाइम्स)/२०४६ सालय् जूगु जनआन्दोलनया सर्वोच्च कमाण्डर गणेशमान सिंहया बुन्हिया लसताय् थौं सुथय् शान्तिबाटिकाय् च्वंगु गणेशमानया झ्वाताय् छगू ज्याझ्वः जुल। गणेशमान सिंह तथा जनआन्दोलन सहिद स्मृति शान्ति प्रतिष्ठानया ग्वसालय् जूगु उगु ज्याझ्वलय् सभामुख सुभाष नेम्बाङ्गं सारंगी थानाः आन्दोलनयात तिबः बियादीम्ह भाजु रुविन गन्धर्वयात थुगु दँया 'जनआन्दोलन स्वर्ण पदक' लःल्हानादिल। ज्याझ्वलय् न्ववासें सभामुख नेम्बाङ्गं आः वइगु मंसीर १४ गते संविधानया मस्यौदा तयार यायेगु लागिं सुं हे सभासद् विदेश भ्रमणय् मवँसे छप्पँ जुयाः ज्या यायेत इनाप यानादिल ।
नेपाली कांग्रेस येँ जिल्लाया सभापति भिमसेनदास प्रधानया सभापतित्वय् जूगु उगु ज्याझ्वलय् केन्द्रीय सभापति सुशील कोइराला, महामन्त्री प्रकाशमान सिंह, सभासद् तीर्थराम डंगोल, एमालेया केन्द्रीय दुजः कृष्ण गोपाल श्रेष्ठपिंसं नं गणेशमान बारे न्ववानादीगु खः ।
