विज्ञ पुचःया बारे नेवाः सभासद्त लिसे सहलह

राज्यपुनर्संरचना अले अधिकार व श्रोत वाँडफाँडया सम्बन्धय् सुझाव कायेगु तातुनाः संविधान सभायापाखें विज्ञ पुचःत दयेकेत्यंगु झ्वलय् नेवाः स्वायत्त राज्यया अधिकार सुनिश्चितताया निंतिं नेवाःतय्पाखें मंकाः कथं गुज्वःगु अडान कायेगु धइगु सम्वन्धय् संविधान सभाय् थीथी राजनीतिक दलयापाखें प्रतिनिधित्व यानाच्वनादीपिं नेवाः सभासद्पिं व नेवाः स्वायत्त राज्य मंकाः संघर्ष समितिया दुजः, सल्लाहकारपि व आन्दोलनकःमिपिनि दथुइ तःजिगु सल्लाह ब्याकेगु ज्या जुल ।

थुगु सहलहया लिधँसाय् संघर्ष समितिपाखें नेवाःतय्गु छगू मंकाः ज्ञापनपौ दयेकाः कंस(कछलागा पारू कुन्हु) हे संविधान सभाया नायः सुभाषचन्द्र नेम्वाङ्गया थाय् लःल्हाइगु ग्वसाः दु । नापं मेमेगु मूमू राजनीतिक दलया नायःपिन्थाय् नं वनाः थुगु ज्ञापनपौ बिइगु ज्याझ्वः दयेकातःगु दु ।

सल्लाहया झ्वलय् नेवाः सभासद्पिन्सं आः दयेकीगु विज्ञ पुचःया कार्य क्षेत्र संविधान सभाया राज्यपुनर्संरचना समितिपाखें पहिचान व सामर्थ्यया लिधँसाय् झिंप्यगू प्रदेश धकाः क्वःछिनातये धुंकुगु आधारभूत सिद्धान्तयात गुगु नं कथं हीकिगु ज्या मजुइमाःगु खँय् छप्वाः म्हुतुं बिचाः प्वंकादिल । विज्ञतय् ज्या प्राविधिक कथं पाय्छि मजूगु प्रदेशया सीमानायात भिंकेगु अले अधिकार व श्रोतया व्यवस्थापनया समस्या ज्यंकेत सुझाव बीगु जक जुइमाः धइगुलि नं सकल सभासद्पिन्सं मंकाः धारणा तयादिल ।

वयकःपिनि बिचाः कथं प्रदेशया ल्याः गुलि जुइमाः वा नां छु जुइमाः धइगु मूलतः राजनीतिक खँ जूगुलिं प्रस्तावित झिंप्यगू प्रदेशया ल्याः व नांयात उखे थुखे यायेगु अधिकार गुगु नं विज्ञ पुचःया जुइमज्यू धकाः नं खवरदारी याःगु दु । अथे हे नीस्वनेत्यंगु विज्ञ पुचलय् दुथ्याइपिं मनोनित मनूत जक जुइगुलिं उमिसं न्ह्यागु हे सुझाव ब्यूसां दक्कले न्हापां राज्यपुनर्संरचना समितियात लःल्हानाः उकियापाखें संविधान सभाय् न्ह्यब्वयेगु व अनुमोदन यायेगु जुइमाः धकाः नं सल्लाह बियादीगु दु ।

नाप नापं दयेकेत्यंगु विज्ञ पुचलय् संघीयता, गणतन्त्र, जातीय स्वायत्तता, स्वशासनया मर्मयात प्रतिनिधित्व यायेफुपिं आन्दोलनकारी नेवाः लगायत आदिवासी मनूत दुथ्यायेमाःगुलि नं बः बियादिल ।

मुक्कं स्वघौ तक न्ह्याःगु उगु सहलह मुँज्याय् नकतिनि नियुक्त जुयादीम्ह राज्यमन्त्री दिलीप महर्जन, महान्यायाघिवक्ता मुक्ति प्रधान, सभासद्पिं हिसिला यमि, हितमान शाक्य, डा. मङ्गलसिद्धि मानन्धर, ध्यानगोविन्द रंजित, बुद्ध साय्मि, रामकृष्ण चित्रकार, राजकाजि महर्जन, उमा कपाली, सत्यलाल मूल व महालक्ष्मी श्रेष्ठपिंन्स ब्वतिकयादीगु खः ।

अथेहे सहलहस् संघर्ष समितिया सल्लाहकारपिं राजेन्द्र श्रेष्ठ व डा. महेशमान श्रेष्ठ, पुलांम्ह सांसद् लक्ष्मीदास मानन्धर, वीरेन्द्रभक्त श्रेष्ठ, श्यामलाल तण्डुकारपिन्स नं थ्व सम्बन्धय् थःथःगु बिचाः तयादीगु खः ।

संघर्ष समितिया नायः सुजीव बज्राचार्यया सभापतित्वय् जूगु उगु सहलह ज्याझ्वःया तातुना व संघर्ष समितिपाखें आः न्ह्याकेगु त्यंगु ज्याझ्वःयायत ध्वाथुइकेगु ज्या सचिवालयया कजि मल्ल के. सुन्दरपाखें जूगु खः ।

थ्वहे झ्वलय् संघर्ष समितिया दुजः दिलीप महर्जन राज्यमन्त्री पदय् नियुक्त जूगु लसताय् भिंतुना प्वंकुसे वयकःयात हनेगु व सगं लःल्हायेगु ज्या नं जूगु खः ।

किपा : नेवाः जागरण मञ्च

More Stories Like this