जग्गा लितबिइगु नितिं जारी याःगु परिपत्र

उपेश महर्जन

एकीकृत नेकपा माओवादीया वरिष्ठ न्वकु मोहन वैद्य 'किरण' पक्षधरं थःगु पार्टीं जारी याःगु परिपत्रय् छेँ जग्गा लित बिइगु विषयसं असहमति न्ह्यथसें लित मबिइगु जूगु दु । प्रचण्ड पक्षया छुं दिं न्ह्यः जक च्वंगु मुँज्याय् ७ बुँदाया सहमतिइ आः लित बिइमानीगु छेँ जग्गा लित बिइगु धकाः क्वःछ्यूगु खः । थ्व हे दथुइ, कन्टेनरया ताःचा लःल्हाःगु इलंनिसें खने दुगु विवाद अझ उत्कर्षय् थ्यंगु दु । न्वकु किरण पक्षं तःक्वःमछि थीथी त्वहः तयाः पाटीया नायः पुष्पकमल दाहाल 'प्रचण्डं' थःगु कार्यदिशायात मूर्तरुप बिइत केन्द्रीय समितिया मुँज्या स्थगित याःगुलिं पार्टीदुने खने दुगु सङघर्षयात ब्यापक यानाः यंकेगु नं क्वःछ्यूगु खः ।

ताःचा लःल्हाःगु विवाद, मधेसी मोचालिसे जूगु प्यंगू बुँदाया सहमति, बिपा सन्धी, सेना समायोजन नाप नापं छेँ जग्गा लित बिइगु विषययात यंकाः स्थानीय स्तरय् यंकेगु जुइ धाःगु दु । 'तःक्वःमछि थीथी कथंया त्वहः तयाः नेतृत्वं केन्द्रीय समितिया मुँज्या सस्थगित यानाः वयाच्वंगु दु । तर आः छुं नं कथंया त्वहः तयाः स्थगित याये फैगु अवस्था मदु ।' एकीकृत माओवादीया वरिष्ठ पोलिट्ब्युरो दुजः हरिभक्त काडेल 'प्रतीकं' धयादिल । एकीकृत माओवादीया नायः प्रचण्डं कार्तिक १८ गते जारी याःगु परिपत्रय् 'लित बिइमाःगु छेँ जग्गात अझ नं पार्टीया नियन्त्रणय् ल्यंदनिगु जूसा अज्वःगु छेँ जग्गा सम्वन्धित मनूयात तत्काल लित बिइगु' धकाः न्ह्यथनातःगु दु । अथे हे, 'किसानतय्सं नियन्त्रणय् कयातःगु मध्ये लित बिइल्यंदनिगु छेँ जग्गाया हकय् तकं सम्वन्धित मनूयात तत्काल लित बिइगु मिलेयायेगु जुइ जोताहा किसानतय्गु हित व अधिकारयात ध्यानय् तयाः क्षतिपूर्ति व वैकल्पिक व्यवस्थाया नितिं तकं माःगु बयान बिइगु' धकाः न्ह्यथनातःगु दु ।