कांग्रेस नेतातय्गु आक्रोस
येँ (झीगु स्वनिगः)
नेपाली कांग्रेसया संसदीय दलया नेता रामचन्द्र पौडेलं मंसीर १४ गते न्ह्यः हे वर्तमान सरकार क्वदली अले थःगु नेतृत्वय् सरकार दयेकेगु जुइ धकाः दावी यानादीगु दु । वय्कलं म्हिगः तनुहुँया दमौलीइ संचारकर्मीतलिसे खँ ल्हायेगु झ्वलय् उगु कथं दावी यानादीगु खः । थः कांग्रेसया संसदीय दलया नेताया ल्याखं न्हूगु सरकारया नेतृत्व यायेगु सुनिश्चित दु धकाः नं नेता पौडेलं धयादीगु दु । वय्कलं धयादिल 'मंसीर १४ गते न्ह्यः हे कांग्रेसया नेतृत्वय् न्हूगु राष्ट्रिय सरकार गठन जुइ ।
आः गुगु कथं प्रधानमन्त्रीं मन्त्रीमण्डल विस्तार यात व धैगु थः लिक्क लाःपिं मनूतय्त छुं ईया नितिं भर्ति याःगु जक खः।' अथे हे कांग्रेसया केन्द्रीय सदस्य सुजाता कोइरालां म्हिगः मंगलवाः तेह्रथुमय् न्वंवायेगु झ्वलय् मन्त्रीमण्डल विस्तार याःगु धैगु शान्ति प्रक्रिया स्यंकेत खः धकाः द्वपं बियादीगु दु । राष्ट्रिय सहमतिया सरकार दयेकेगु खँ जुयाच्वंगु इलय् अथे मन्त्री परिषद् विस्तार याःगुलिं शान्ति प्रक्रियाय् लिच्वः लाइ धकाः वय्कलं ख्याच्वः तकं बियादीगु दु । प्रेस युनियन तेह्रथुमं म्याङलुङय् याःगु पत्रकार सम्मेलनय् शान्ति प्रक्रियायात त्वःताः विदेश भ्रमणय् वंपिं नेतातप्रति आक्रोस प्वंकादिल । थःगु हे पार्टीया नेतात रामशरण महत व मिनेन्द्र रिजाल विदेशय् वंगु नापं शान्ति समितिया मूमू मनूत विदेशय् वनाः समस्या ब्वलंगु, प्रचण्डंनिसें बाबुराम तकं पिहांवंगु प्रति नं आक्रोस प्वंकादिल ।
