यकःति सरकार विस्तार
येँ (झीगु स्वनिगः)
सरकारं याकःति कथं मन्त्री परिषद्यात म्हिगः मंगलवाः न्याक्वःखुसि विस्तार याःगु दु । एकीकृत माओवादीया केन्द्रीय कमिटीया मुँज्या न्ह्यानाच्वंगु नापं पार्टी दुनेया बरिष्ठ न्वकु मोहन बैद्य किरण पक्षधरया नितिं धकाः ल्यंकातःगु थासय् तकं पार्टीया नायः प्रचण्ड व न्वकु डा. भट्टराई पक्षया नेतातय्त आकाझाकां गुगु कथं मन्त्रीइ नियुक्तियात उकियात कयाः माओवादीया नेतात हे अजूचाःगु दु ।
अल्पकालिन जक जूसां मन्त्री यानाः पार्टी दुने लाइन संघर्षया झ्वलय् थःगु ल्हातय् नेता व कार्यकर्तात कायेगु निति. अथे मन्त्री मण्डल विस्तार याःगु खयेमाः धकाः माओवादीया छम्ह नेतां धयादीगु दु । सरकारं माओवादीपाखें खुम्ह अले सदभावना आनन्दीदेवीपाखें छम्ह यानाः ७ म्ह मन्त्रीत अले १९ म्ह राज्यमन्त्रित थप याःगु खः । प्रधानमन्त्री भट्टराई सार्क सम्मेलनय् ब्वति काःवने न्ह्यः म्हिगः हथासं अथे मन्त्री परिषद् विस्तार याःगु खः । सरकार जम्वो मन्त्रि परिषद् जूगु दु । मुक्कं यानाः ४६ म्ह मन्त्रीत जूगु दु ।
