'१४ गते न्ह्यः हे जिगु सरकार'

येँ (सन्ध्या टाइम्स)/प्रमुख प्रतिपक्षी दल नेपाली कांग्रेस संसदीय दलया नेता रामचन्द्र पौडेलं डा. बाबुराम भट्टराईया नेतृत्वय् दुगु वर्तमान सरकार क्वःदलाः थःगु नेतृत्वय् सरकार गठन जुइगु दावी यानादीगु दु। थौं सुथय् तनहुँया दमौली लागाय् रिपोर्टर्स क्लबं संचाकर्मीत मुंकाः याःगु साक्षात्कार ज्याझ्वलय् न्ववासें भाजु पौडेलं उगु दावी यानादीगु खः ।

आः दयेकीगु सरकारया नेतृत्व सुनां याइ धकाः संचारकर्मीतय्सं न्यंगु न्ह्यसःया लिसः बिसें नेता पौडेलं कांग्रेसया नेतृत्वय् सरकार गठन जुइ नापं कांग्रेस संसदीय दलया नेता थः हे जूगुलिं थम्हं हे न्हूगु सरकारया नेतृत्व यायेगु दावी नं यानादीगु खः ।

कांग्रेस नेतृत्वय् गठन जुइगु सरकारं जक न्हूगु संविधानयात पूर्णता बी धयादिसें थौं मन्त्री मण्डल विस्तार यायेगु तयारी याःगु धइगु थः लिक्क लाःपिं मनूतय्त छुं ईया नितिं जक प्रधानमन्त्री डा. बाबुराम भट्टराईनं भर्ति याः खः धकाः नं धयादिल। शान्ति प्रक्रिया पूवंकेगु विश्वासया आधारय् हे दलतय् दथुइ ७ बुँदाया सहमति जूगु खः धासें वय्कलं माओवादी सेनायात माओवादीया मापदण्ड कथं मजुसे नेपाली सेनाया मापदण्ड कथं समायोजन यायेगु जुइ धयादिल ।

पौडेलं धयादिल 'नेपाली सेनाया मापदण्डय् च्वने मछिंपिं व अंगभंग जूपिंत पुनःस्थापना यायेगु जुइ। थुकियात कयाः माओवादी अध्यक्ष प्रचण्ड सकारात्मक जूगु दु। शिक्षाय् माओवादी सेनायात छगू तह थप यायेगु सहमति जूगु दु।'
नेपाली कांग्रेसया थीथी भ्रातृ संगठनया विवादया प्रसंगयात कयाः न्ववासें नेता पौडेलं भातृ संगठनया विवाद छुं ई लिपा समाधान जुइ धयादिल ।

वय्कलं धयादिल, 'सभापति सुशील कोइरालां महिला, विद्यार्थी लगायतया भातृ संघया संयोजक ल्ययेगु तयारी यानादीगु दु ।'

सार्कय् वने न्ह्यः मन्त्रीमण्डल विस्तार
प्रधानमन्त्री डा. बाबुराम भट्टराई सार्क शिखर सम्मेलनय् ब्वति कायेत माल्दिभ्स वने न्ह्यः हे थौं मन्त्रिपरिषद्या न्याक्वःगु विस्तार यासें न्हय्म्ह मन्त्री थपे यानादीगु दु।
विस्तारित मन्त्रिपरिषद्य् एकीकृत माओवादीपाखें खुम्ह व सदभावना पार्टीपाखें छम्ह मन्त्री दुथ्याकूगु दु ।

विस्तारित मन्त्रिपरिषदय् माओवादीया प्रवक्ता दिनानाथ शर्मायात शिक्षा, लोकेन्द्र बिष्ट मगरयात पर्यटन, भीम प्रसाद गौतमयात भूमिसुधार तथा व्यवस्था, सत्या पहाडीयात शान्ति तथा पुनर्निर्माण, कल्पना धमलायात विज्ञान तथा प्रविधि व राजकुमार यादवयात सामान्य प्रशासन मन्त्रालयया जिम्मेवारी बिउगु दु ।

वर्तमान सरकारय् माओवादी दुनेया अध्यक्ष प्रचण्ड व प्रम भट्टराई पक्षधर नेतात जक मन्त्री जूगु दुसा बरिष्ठ नेता मोहन बैद्य पक्षधर सुं नं नेता मन्त्री जूगु मदु। अथे हे सद्भावना पार्टीया सरिता गिरीयात नं मन्त्री दयेकूगु दु ।

थ्वहे दथुइ प्रधानमन्त्री भट्टराई सार्कया १७ क्वःगु शिखर सम्मेलनय् ब्वति कायेत थौं हे झिंछम्हेसिया पुचःया नेतृत्व यानाः माल्दिभ्सय् वनीगु जूगु दु। थौं मन्त्रीमण्डल विस्तार याःगुली छगू दर्जन राज्य मन्त्रीत नं नियुक्त याःगु दु। राज्य मन्त्री जूपिं मध्ये नेवाः आन्दोलनय् क्रियाशील जुयादीम्ह माओवादी सभासद् दिलीप महर्जन नं दुथ्याःगु दु ।