समायोजित निर्देशनालयया प्रमुख जुइम्ह सु?
येँ (सन्ध्या टाइम्स)/स्वंगू तःधंगु दल व मधेसी मोर्चा दथुइ न्हय्गू बुँदाया सम्झौता जूसां आः उगु सम्झौता कथं सरकार परिवर्तन जुइबलय् सु प्रधानमन्त्री जुइ धइगु विवाद ला वःगु हे जुल, उकिया नापनापं सेना समायोजन यासें गठन जुइगु सुरक्षा निर्देशनालयया प्रमुख सु जुइ धइगु खँय् नं विवाद पिहां वःगु दु। उगु निर्देशनालय नेपाल सेनाया प्रस्ताव कथं गठन जूगु जूगुलिं उकिया प्रमुख नेपाली सेनायाम्ह हे जुइ धकाः एमाले व कांग्रेसं दावी याःगु दुसा माओवादीं उकिया प्रमुख सेनायाम्ह हे जुइ धइगु खँ अझ नं क्वःजिउगु मदुनि, प्रमुख पद थःपिंत बीमाः धकाः दावी यानाच्वंगु दु। थ्व निर्देशनालय खास यानाः माओवादी लडाकुया लागिं हे गठन याःगु कारणं थुकिया प्रमुख माओवादी जुल धाःसा उकिं बांलाक ज्या याये फइ व थ्व न्यायसंगत नं जुइगु माओवादीया दावी दु ।
सेना समायोजनया खँ क्वःजिउसां कन्हय् उकिया प्रमुख जुइ धइगु खँय् हानं विवाद पिहां वइगु संकेत थ्व दावीपाखें पिदंगु खँ सूत्रं धाःगु दु ।
