जनजाति सम्मेलनं संघर्षया ज्याझ्वः पित बीगु
येँ (सन्ध्या टाइम्स)/नेपाल आदिवासी जनजाति महासंघया थ्व हे २४ व २५ गते सिन्धुपाल्चोकया चौताराय् जुइगु निक्वःगु सम्मेलनं आदिवासी जनजातिया अधिकार संविधानय् सुनिश्चित यायेगु निंतिं संघर्षया ज्याझ्वः तकं तयार याइगु जूगु दु ।
जनजाति महासंघया महासचिव आङकाजी शेर्पां थुगुसीया सम्मेलनं न्हूगु संविधानय् जातीय पहिचानया आधारय् प्रदेशत निर्माणया ज्या सुनिश्चित याकेगु नितिं, आत्मनिर्णयया आधिकार नापं जातीय स्वायत्तता व स्वशासनया नितिं संघर्षया ज्याझ्वः पित बीगु जुइ धयादीगु ।
जनजाति महासंघय् आबद्ध जुयाच्वंगु थीथी जातीय संगठनंनिसें अन्तर्राष्ट्रिय मञ्चया प्रतिनिधितय्सं तकं ब्वति काइगु उगु सम्मेलनया उलेज्या समारोह चौताराय् तःजिक यायेगु नितिं आन्तरिक तयारी जुइधुंकूगु जानकारी नं वय्कलं बियादीगु दु ।
