कलंकीइ बसं क्यलाः मनू सित
येँ (सन्ध्या टाइम्स)/थौं सुथय् कलंकी लागाय् बसं क्यलाः छम्ह मनू सीगु दु। अनया सीता पेट्रोल पम्प न्ह्यःने छगः भाडाया बसं लँय् न्यासि वयाच्वंम्ह मनूयात क्यःगु खः। मनू क्यलेवं बसया चालक व सह चालक धाःसा बिसिउँ वंगु दु।महानगरीय ट्राफिक प्रहरीं धाः कथं सुथय् ७:२० बजे ग्यारेजं पिकयाच्वंगु ना. ३ ख ६८३६ नम्बरया बसं ५५ दँया मानबहादुर गोलेयात क्यःगु खः। गोलेया छेँ सर्लाही जूसां थौंकन्हय् किपुली च्वनाच्वंगु खः। मनू क्यलेवं बिसिउँ वंपिं बसया चालक व सह चालकयात प्रहरीं मालाच्वंगु दु। मनू क्ययेकूगु बसयात ट्राफिकं ज्वनाः कालिमाटी प्रहरी चौकीइ यंकूगु दु। सीम्ह मनूया लाश प्रहरीं पोष्ट मार्टमया लागिं ज्वना वंगु दु ।
