परम्परागत संघया झिक्वःगु दँमुँज्या
यल (सन्ध्या टाइम्स)/नेपाःया बुद्धधर्म व बौद्ध संस्कृतिया संरक्षण व सम्बर्द्धन यायेगु तातुनां ने.सं. ११२१ य् नीस्वंगु नेपाल परम्परागत बौद्ध धर्म संघया झिक्वःगु दँमुँज्या सभासद् हिसिला यमिया प्रमुख आतिथ्यय् क्वचाल। ज्याझ्वःया उलेज्या यानादिसें मय्जु यमिं 'सुनां युद्धयात म्हसी वं शान्तियात नं म्हसी' धासें झिदँ तक जनयुद्धय् सहभागी जुइधुनापिं थःपिंसं शान्ति छु खः धइगु खँ बांलाक सिउगुलिं थःपिंसं देशय् शान्ति हयेगु नितिं थौंकन्हय् शान्तिया नेतृत्व यानाच्वनागु खँ कनादिल ।
अथे हे ज्याझ्वलय् पाहांकथं झायादीम्ह प्रा. तिमिला यमिं थौंकन्हय् विश्वय् शान्ति हयेगु नितिं थीथी देशं कार्ययोजना दयेकाः यक्व ध्यबा फुकाच्वंगु जूसां नेपालय् धाःसा आः तक नं शान्ति हयेगु छुं हे ज्या मजूगु खँ कनादिल। उकिं बुद्धं प्राप्त याःगु धाथेंयागु शान्ति छु खः धकाः सीकेगु नितिं अनुसन्धान यायेत सरकारं ध्यबा लगानी यायेमाःगु खँय् वय्कलं बः बियादिल ।
सभापतिया थासं न्ववासें ग्वसाः खलःया नायः डा. नरेशमान वज्राचार्यं नेपाःया बुद्धधर्मय् दयाच्वंगु विकृति न्हंकेगु व सम्पदाया संरक्षणया नितिं थुगु संघं कुतः याना वयाच्वंगु जानकारी बियादिल। सम्पदा संरक्षण यायेगु झ्वलय् नेपाःया मौलिक वास्तु शैलीया संरक्षण यायेत लुम्बिनीइ नेपाल बज्रयान महाविहार दयेकेत्यनागु खँ नं वय्कलं कनादिल ।
संघया महासचिव माणिकरत्न शाक्य "मणीशं" वार्षिक प्रतिवेदन न्ह्यब्वयादीगु उगु ज्याझ्वलय् कोषाध्यक्ष इन्जिनियर सिद्धिबहादुर बज्राचार्यं आर्थिक प्रतिवेदन न्ह्यब्वयादीगु खः। संघया बार्षिक साधारण सभाया सफलताया कामना यासें नेपाल बौद्ध महासंघया उपाध्यक्ष थुप्तन जिग्देलं बुद्धया कारणं हे नेपाःमिपिंत विश्वं म्हसीकाच्वंगु जूगुलिं आः झीसं नं बुद्धयात म्हसीकेगु कुतः यायेमाः धयादिल ।
ज्याझ्वलय् अखिल नेपाल भिक्षु महासंघ, बज्राचार्य संरक्षण गुथि व परम्परा बचत संस्थापाखें नं भिंतुना बिउगु खःसा संघया उपाध्यक्ष डिल्लीराज बज्राचार्यं सुभाय् देछानादीगु खः ।
