अक्टोबर समाजवादी क्रान्ति दिवस

कृष्ण प्रजापति

विश्व सर्वहारा वर्गया महान नेता भ्लादिमिर इल्लिच लेनिनं थौं स्वयां ९४ दँ न्ह्यः रुसय् अक्टोबर समाजवादी क्रान्ति पूवंकादीगु खः। विश्वय् न्हापांखुसी समाजवादी ब्यवस्था स्थापनाया घटना जुयाः उगु दिं तसकं हे महत्वं जाःगु न्हि नं जूगु खः। पुँजीवादी ब्यवस्थां समाजया फुक्कं समस्या समाधान याये मफइगु कारणं हे विश्वय् समाजवादी अवधारणाया सिर्जना जूगु खः। आः रुसय् समाजवादी ब्यवस्था धाःसा मंत। अथे खःसां विश्वया सर्वहारा वर्गीय जनतां धाःसा न्हापांखुसी ताःलाःगु समाजवादी क्रान्तियात लुमंकाः दँय्दसं अक्टोबर क्रान्ति दिवस हनेगु याना वयाच्वंगु दु। रुसी पात्रो कथं नोभेम्बर महिनाय् लाइगु थुगु अक्टोबर समाजवादी क्रान्ति दिवस थुगुसी नं विश्वन्यंकं थीथी ज्याझ्वःत यानाः हनाच्वंगु दु। विश्वन्यंकं पुँजीवाद हावी जुयाः समाजवादी ब्यवस्था रक्षात्मक स्थितिइ लानाच्वंगु इलय् समाजवादी क्रान्ति दिवस हनेगु छगू स्वयम नं महत्वं जाःगु खँ जुयाबिउगु दु।
न्ह्याथाय् वनेमाःसां न्ह्यागु यायेमाःसां तयार जुइपिं कम्युनिष्ट कार्यकर्तातय्गु सशस्त्र युद्धं हे जक रुसय् सन् १९१७ य् अक्टोबर क्रान्ति ताःलाःगु खः। वयां न्ह्यः अन जार सरकारयात पतन यायेगु निंतिं फेब्रुअरी क्रान्ति जूगु खः। अक्टोबर क्रान्ति उलि याकनं जूगुलिं अन पुँजीपतितय्सं तःधंगु थाय् काये मफयावंगु खः। तर झीगु देशय् धाःसा शाह वंशया एकछत्र शासन पतन जुइधुंकाः हतियार हे ल्ह्वनाः क्रान्ति यानाच्वंगु शक्तिं थज्याःगु अक्टोबर क्रान्ति थेंज्याःगु समाजवादी आन्दोलनयात प्रचार नं मयाः उखेपाखे वनेगुलि ध्यान नं मतः। सवल राजनीतिक शक्तिं हे न्ह्यःने महःगु उगु विषययात सुना नं उलि चिउताःया विषय कथं मनालेवं क्रान्ति अन लाः थन लाः मदया वन। थौं प्रचण्ड बाबुरामपिं क्रान्तिपाखें स्थापित जूपिं धायेत तकं मछाले मायेक विदेशीया इसाराय् चले जुइगु थेंज्याःगु प्रबृत्ति क्यनेगुली न्ह्यचिलाच्वंगु दु।
विचारं सुसज्जित जुयाः हतियार ल्ह्वनीगु शक्तिं हे जक वास्तवय् क्रान्ति व युद्ध ताःलाके फइगु खः। जनतायात सुसज्जित यायेगु स्वयां खालि ल्वाभः भरय् हे जक क्रान्ति ताःलाकेत स्वयेगु खःसा उगु क्रान्ति दीर्घकालीन रुपं तिके जुइ फइ मखु। झीथाय् जूगु हे थथे खः। माओवादीया ल्वाभः खनाः ग्यानाः जनता माओवादीया पँ लिना जूगु खः। तर वयागु सिद्धान्त, विचार व आन्दोलनया पहःयात नुगलंनिसें ह्दयंनिसें स्वीकार यायेगु पक्षय् नेपाली जनता वने मफयाच्वन। बलजफ्ती आन्दोलन यानाः क्रान्ति सफल यायेवं थथे हे जुइगु खः। पेरिस कम्युन नं अथे जुयाः हे असफल जूवंगु खः। छुं हतियारधारी शक्तियात तालिम यानाः सशस्त्र युद्ध यायेवं छकःया लागिं ला सत्ता कब्जा हे यायेफइ। तर जनमानसं उकियात पचे याये मफइगु व उमिगु मानसिकताय् हे क्रान्ति धायेवं हत्या, हिंसा व आतंक थेंजक च्वनीगुलिं यानाः नं थ्व आमूल परिवर्तनया लागि वा थःपिनि लागिं हे ल्वाभः ल्ह्वंगु खः धइगु मथुइवं व क्रान्ति ताःलाये फइ मखु। पेरिस कम्युन ७५ न्हु लिपा क्वःदःगु कारणं थ्व हे खः ।

समाजवादी गणतन्त्रया पक्षपातीतय्सं पूँजीवादी सत्ताय् वनाः उकिया लाभ कायेगु सोच तइ मखु। बरु गथे जितः अथे पूँजीवादी बन्दोबस्तयात फयांफछि याकनं ध्वस्त यानाः आः न्हूगु परिपातिया विकास गुकथं याना वनेगु धइगु हे सोच तयाः ज्या यानाच्वनी। झीगु देशय् संविधानसभाया न्हापांगु बैठकय् समाजवादी आन्दोलनया पक्षपाति कथं प्यम्ह हे जक सभासद्त खने दयेकः वःगु खः। उमिसं हे जक वास्तविक जनताया समाजवाद हयेगु खँय् मतदान याना क्यन। तर मतदान वा चुनावं नं थ्व समाजवादी ब्यवस्था वइगु मखु। अक्टोबर समाजवादी क्रान्ति नं अथे मतदान यानाः वा बहुमत खाकाः वःगु चीज मखु। तत्कालीन ड्यूमाय् थःपिनि बहुमत दुसां मेन्सेविक व बोल्सेविक दथुइ तसकं मिले मजुइवं बोल्सेविकतय्सं अबलय् थुगु बोल्सेविक क्रान्ति कथं हे अक्टोबर समाजवादी क्रान्ति ताःलाका मेन्सेविक पार्टी लगायत फुक्कं संशोधनवादी व पूँजीवादीतय्त थःपिनि मातहतय् तयेत ताःलाःगु खः। थज्याःगु महत्वपूर्ण क्रान्तियात पश्चिमा जगतया प्रचार यन्त्रया कारणं निगू दशक न्ह्यः ध्वस्त याना बिउगु खः। थौं रुस झिंन्यागू गणतन्त्रय् विभाजित जूवंगु दु। थ्व ई विश्वय् पूँजीवादी बन्दोबस्तय् नं थीथी कथंया समस्या वयाच्वंगु ई खः। न्हापा गथे समाजवादी बन्दोवस्तय् समस्या वयेवं पूँजीपतितय्सं उकिया लबः कयाः थीथी समाजवादी बन्दोबस्त दुगु देशयात पूँजीवादीकरण याना यंकूगु खः। थ्व इलय् समाजवादी प्रचार तीब्र यानाः उकियात लागू यायेगु काइदा माला वनेगु खत धाःसा थ्व इलय् वःगु पूँजीवादी संकट समाजवादी क्रान्तिया लागिं बांलाःगु अवसर जूवनेफु। तर झीगु देशय् क्रान्ति, समाजवाद व युद्ध धाइपिं नेतात बालुवाटारय् बृहत् शान्ति सम्झौताय् वनाः युद्धयात तिलाञ्जली बियाः तःधंगु पूँजीवादी पार्टी कायम याइगु थेंज्याःगु ज्याय् कम्युनिष्ट पार्टी हे न्ह्यःने लानाच्वंगु अवस्था जुयाः नं तत्काल क्रान्ति व समाजवादी ब्यवस्था सम्भावना मदु। प्रचण्डया कथं हे हाकनं निसः प्यसः दँ न्ह्यः देशय् समाजवादी क्रान्ति सम्भव मजू। जनता तयार मजुइकं समाजवादी क्रान्ति ताःमलाइगु धाःसा पक्का खः। तर समाजवादी प्रचार अभियानयात धाःसा आः हे निरन्तर न्ह्याका च्वनेमाःगु ई खः। उलि हे नं थनया कम्युनिष्ट पार्टीं याना मक्यं ।

थःपिनि हे जक स्वार्थ दलीय स्वार्थ व सत्ता भागबन्डाया स्वार्थय् लानाच्वंतले समाजवादी आन्दोलन न्ह्यःने वने फइगु स्थिति मदु। विश्वय् अक्टोबर समाजवादी क्रान्ति दिवस न्यायेकाच्वंगु थ्व इलय् जरुर नं नेपाली क्रान्तिकारी पार्टीतय्सं थुगु पूँजीवादी बन्दोबस्तया थासय् आः न्हूगु आधुनिक बैज्ञानिक समाजवादी बन्दोबस्तया शुरुवात यायेमाल धइगु कथंया छगू ठोस निर्णय यानाः न्ह्याः वन धाःसा आः सच्छि निसःदँ तक झीगु देशय् समाजवादी क्रान्ति जुइ मखुनि धकाः निराश जुयाः थ्व हे पुँजीवादी बन्दोबस्तया भागबन्डाय् तक्यनाच्वनेमाःगु स्थिति नेपाःया कम्युनिष्ट पार्टी धाःपिंत मवइगु खः। वास्तविक समाजवादी क्रान्ति यायेत थीथी कम्युनिष्ट वा वामपन्थी शक्ति छथाय् लाःगु खःसा थन नेपाली जनतां सोचे यानाच्वंगु थेंज्याःगु समाजवादी बन्दोबस्त व रुसय् अक्टोबर क्रान्ति थेंज्याःगु क्रान्ति नं ताःलाइ। मखुत थःपिनि स्वार्थया लागिं हे जक ज्या याना जुइगु खःसा ७५ न्हु तूगु पेरिस कम्युन व ७५ दँ टिके जूगु रुसी क्रान्तिया पाठ झीसं मकाःनि धइगु सीदइ ।

More Stories Like this