थ्व सम्झौता नं चाल हे जकं खः कि?

स्वंगू तःधंगु दल व मधेसी मोर्चा दथुइ जूगु न्हय्गू बुँदाया शान्ति सम्झौता कार्यान्वयन जुया वनीगु व जुया वंसां हे नं इलय् क्वचाइगु खँय् शंका पिहां वःगु दु। दलतय् दथुइ जूगु सम्झौता लागू यायेगु लागिं म्हीग च्वंगु सेना समायोजन विशेष समितिया बैठक कोरम हे मगाःगु कारणं यानाः च्वने मफुत। समितिया च्याम्ह मध्ये न्याम्ह दुजःत अमेरिका भ्रमणय् वनाच्वंगु कारणं बैठक तकं च्वने मफुगु खः। देशय् शान्ति मदयाः अथे जुल वा थथे जुल धकाः नेतातय्सं न्ह्याक्व हे पिने न्ववायेगु याःसां वास्तवय् शान्ति हयेगु सन्दर्भय् धाःसा उपिं पटक्क हे गम्भीर मदु धइगु खँया थ्व ज्वलन्त दसु खः। संविधानसभाया दुजः जुयाच्वंपिं फुक्कं नेतातय् न्हापांगु चिउताः थ्व इलय् शान्ति व संविधान हे जुइमाःगु खः। तर उमिसं शान्ति व संविधानयात छुं हे चिउताः मतःगु जुयाच्वन धइगु खँ आः विशेष समितिया बैठक छगू तकं च्वने मफुगुलिं नं सी दत। उकुन्हु शीर्ष नेतातय् दथुइ जूगु शान्ति सम्झौता तुरुन्त हे कार्यान्वयन याना यंकूसां नं सेना समायोजनया ज्या इलय् सिधइ मखु धकाः धायेगु याना हःगु दु। आः ज्या न्ह्याकेत बैठक जक च्वने त्यंबलय् नं सदस्यत मदयाः कोरम मगाः। थ्व पहलं इलय् ज्या सिमधइगु निश्चित हे जुल। सम्झौता यानाः थःपिं धाःसा विदेश शयरय् ब्वाँय् जुइगु नेतातय्गु थ्व पहलं यानाः आः जूगु शान्ति सम्झौता नं वास्तवय् जनताया मिखाय् धुलं छ्वाकेगु चाल जकं खः लाकि धइगु शंका पिहां वःगु दु। संविधानसभाया म्याद थपे यायेगु त्वहः दयेकेत जक नेतातय्सं थ्व सम्झौता याःगु खः धकाः वयाच्वंगु द्वपंयात नेतातय्गु पहलं पुष्टि यायेत स्वयाच्वंगु दु ।

More Stories Like this