काईंला बाया पार्टी जीवन

दशराज शाक्य

लुमन्ति
ने.सं. ११३१ कौलागा एकादशी कुन्हु काईंला बा यल अल्का अस्पतालय् मंत। ८९ दँय् मदुम्ह काईंला बायात मंगलय् हयाः न्हिछि तयाः कन्हय् कुन्हु ए.नेकपा माओवादीया केन्द्रीय ज्याकू पेरिसडाँडाय् सुथबःछि तयातल। कौलागा द्वादशि (कार्तिक ७ गते) सोमबाः कुन्हु सुथय् ९:०० बजे जि याकःचासां काईंला बाया अन्तिम दर्शन यायेत पेरिस डाँडाय् थ्यंकः वना ।

पेरिसडाँडाय् थ्यंबलय् ९:३५ बजे जुल। अन कमरेड पासापिं हुलमुल मुनाच्वने धुंकल। काईंला बायात गाडीइ तया तयेधुंकूगु जुयाच्वन। उघिमय् नेकपा (एमाले) या नायः व पुलांम्ह प्रधानमन्त्री झलनाथ खनालजु थ्यंकः झाल। वय्कः टेबलय् गयाः स्वांमा ज्वनाः गाडी तयातःम्ह स्वर्गीय काईला बायात अन्तिम श्रद्धाञ्जली देछानाः कुहां झाल। वय्कः धुंकाः जि नं स्वांमा ज्वनाः काईंला बायात अन्तिम श्रद्धाञ्जली बियाः थःगु मोबाइलं वय्कःया अन्तिम किपा नं कया ।

थःगु ज्या छखे ल्यं दनिगुलिं अन मुनाच्वंपिं कमरेडपिंत नतुसुतु यानाः जि छेँय् लिहां वया। मेगु वसः पुनाः 'जि नेवाः' लसता-पौया निंतिं पासा यू.पी. जोशी नाप लायेत प्रेसय् ब्वाँय् वना, न्हूदँ ने.सं. ११३२ या तयारीया निंतिं।
आः थन काईंला बाया चर्चा याये:
वि.सं. २०३७ साल वैशाखं नेकपा (चौथो महाधिवेशन) पाखे आम निर्वाचन बहिष्कार यायेगु झ्वलय् 'बहिष्कार पर्चा' कमसेकम झिद्वः ति इने धुन जुइ। गाःबाहालय् थ्यंकाः स्वम्ह पुलिसतय्सं जितः च्याप्प ज्वन। जितः ज्वनेखतं छम्हेसिनं पर्चा निं लाका काल। मेपिं निम्हेसिनं इकिधिकि हे सने मजीक क्वातुक ज्वना यंकल। थानाय् बाघौ ति तयाः जितः गाडीइ तयाः जावलाखेल पुलिस शिविरय् यंकल। अले ला छु मानि धकाः, पुलिसतय्सं दायेगु मौका चूलात। दादां दादां न्हिनसिया ३:३० बजे जुल। स्वपु चिचीपुगु कथि नं त्वःधुल। अले तिनि खोरय् त्वःते हल। खोरय् ला मेमेपिं विद्यार्थी बन्दीत नं लाना च्वनेधुंकल। बहनी १०:३० बजे जितः पुलिस हाकिमं सःतके छ्वया हल। जि सरासर वना। हाकिमं जितः धाल, 'विद्यार्थी हँ छ ! पार्टी राजनीतिइ गुकथं सना जुयागु?'

जिं छुं हे न्वमवाना। हाकनं मेपिं स्वम्ह पुलिसतय्सं कथिं कि कथिं मुइकल जितः। थुकथं न्हिंन्हिं जितः न्हय्न्हु तक दादां इपिं हे कायल जुयाः च्यान्हु दयेकाः बहनीसिया ११ बजे "छ तये थाय् मदु" धकाः त्वःताहल ।

कन्हय् कुन्हु पार्टीइ स्वापू तया। उबलय् पार्टी महामन्त्री क. दमदम (मोहनविक्रम सिंह घर्ति मगर) जुयाच्वन। वय्कःया हे राजनीतिक प्रस्ताब बमोजिम आम निर्वाचन बहिष्कार घोषणा जूगु जुयाच्वन। उबलय् जि पाटन संयुक्त क्याम्पसय् राजनीति शास्त्र (मेजर सब्जेक्ट, मू विषय) कयाः आइ.ए. (सर्टिफिकेट लेभल) ब्वनाच्वनागु। बहनीसिया ८ बजे नं पार्टी सभाय् हाजिर जूवना। सभाय् जितः सेल समितिइ सचिव नियुक्ति बियाः पार्टी सदस्यता बिउम्ह काईंला बा (देवेन्द्रलाल श्रेष्ठ) जुयाच्वन। थनंनिसें जि काईंला बाया छेँय् न्हिंन्हिं वनेगु याना। जिगु बानी व्यहोरा दक्व सीकेधुंकाः काईंला बानं जितः पूरा विश्वास यानाहल ।

अथे हे २०३९/४० सालपाखे जुइमाः नेकपा यल जिल्ला समितिया सम्मेलन गोदावरीइ यायेगु घोषणा जूगु। उगु सम्मेलनया निंतिं माघ महिनाया (सिल्लाथ्व) बहनीसिया ८ ताः इलय् तच्वकं चिकुगुलिं दोलाईंगां न्ययाः मेमेपिं कमरेड पासापिंलिसे गोदाबरीइ न्यासि वना। अन गन थासय् यंकूगु खः थौं तक पत्ता लगे मजू। सुयातं कँ नं मकं। यंकूबलय् लँय् वँवं हे छगू सुरुङ्गं छम्ह ज्यापु कमरेडं मैनमत च्याकाः ब्वना यंकादिल। लँय् वँवं (सुरुङ्ग ताःहाकः जूगुलिं) ज्यापु कमरेडं धयादिल, "थ्व सुरुङ्गय् छक्वः धुँ नं वयेधुंकल। अथे जूगुलिं बांलाक होसियार जुयाः झासँ !"

सुरुङ्गं सरासर वनेबलय् थ्याक्क हे निम्ह दांग्रामांग्राम्ह धुँ थें हे च्वंम्ह खिचातय्सं "ह्वाउँ" यानाः उल। अले मेपिं निम्ह ज्यापु कमरेडपिंसं लालटिन च्याकाः क्यं वल।
अन ला चुकय् धकाःसा थ्यन। सुरुङ्गं चुक स्वाःगु जुयाच्वन। ज्यापु कमरेडपिं मध्ये छम्हेसिगु छेँय् ब्वना यंकल। तलय्, च्वतय् च्वंगु क्वथाय् थ्यंबलय् अन काईंला बा न्ह्यकुन्हु हे झायाच्वंगु जुयाच्वन। बहनीसिया १०:३० बजे जुइ धुंकूगुलिं सकलें द्यना छ्वत। कन्हय् कुन्हु सम्मेलन न्ह्यात। सम्मेलनय् प्रतिवेदन काईंला बानं च्वयादीगु जुयाच्वन। प्रतिवेदनय् भाषा, व्याकरण व परिमार्जन यायेगु ज्या जितः काईंला बानं बियादिल। जिं व्याकरण जक मिले याना बिया। मेगु यायेगु थःगु कर्तव्य जिं मतायेका ।

थुकथं काईंला बाया जीवन धइगु हे पार्टी जीवन खः। पार्टी मदयेक म्वाये मफुम्ह काईंला बा प्राविधिक गडबडीं यानाः कम्युनिष्ट पार्टी पलिस्था जूबलय् थ्यंके मलाःगुलिं संस्थापक दुजलय् मलात। थ्व खँ ए. नेकपा माओवादीया नायः पुष्पकमल दाहाल प्रचण्डं नं स्वीकार यानादीधुंकूगु दु ।

थ्व खँ उकुन्हु ने.सं. ११३१ दिल्लागा (चतुर्दशी) गथांमुगः चःर्‍हे कुन्हु (वि.सं. २०६८ श्रावण १३) नं चर्चा जुल। थुकुन्हु काईंला बाया जंक्व (८९ दँ) अभिनन्दन ज्याझ्वः नं जूगु खः। थ्व ज्याझ्वलय् नेवाः स्वायत्त राज्य मंकाः संघर्ष समिति सचिवालयया संयोजक मल्ल के. सुन्दर नं झाःगु खः। शायद उकुन्हु यल, अशोक पार्टी प्यालेसय् जूगु जंक्व ज्याझ्वलय् मन्हिउपिं मनूत म्हो हे जुइ। छाय्धाःसा काईंला बाया जंक्व ज्याझ्वः गथांमुगः चःह्रे कुन्हु हे लानाच्वन ।

आः ने.सं. ११३२ कछलाथ्व नवमि (वि.सं. २०६८ कार्तिक १८ गते) कुन्हु काईंलाबाःया झिंस्वन्हु तिथि क्यंगुलिं सुखावति भुवनय् बास लायेमा धकाः मनं तुनाच्वना।
ने.सं. ११३२ कछलाथ्व नवमि कुन्हु (कार्तिक १८ गते) यलया मंगलबजारय् काईंला बाया श्रद्धाञ्जली सभाय् माओवादी नायः पुष्पकमल दाहाल प्रचण्ड व काईंला बाया सरल, अनुशासित, इमान्दारी जीवन व कुशल नेतृत्वं कम्युनिष्ट आन्दोलनयात थन थ्यंक हयेफुगु खँ कनादीधुंकूगु दु। काईंला बाया नेतृत्वयात फुक्कसिनं आत्मसात याइ धइगु भलसा कयाच्वना। सुभाय् ।

More Stories Like this