सरकार हिलेगु नितिं सहमतिया डिजाइन

येँ (झीगु स्वनिगः)

वर्तमान सरकारयात हिलेगु नितिं डिजाइन यानाः हे न्हय्गू बुँदाया सहमति याःगु स्पष्ट जुयावःगु दु । नेकपा -एमाले)या नायः झलनाथ खनालं म्हिगः सोमवाः संचारकर्मीतलिसे खँ ल्हायेगु झ्वलय् वर्तमान सरकारयात हे राष्ट्रिय सहमतिया सरकार दयेकेगु आशय कथं न्हय्गू बुँदाया सहमति यानागु मखुसें आः न्हूगु हे सरकार दयेकेमाः धकाः धयादीगु दु । वय्कलं डा. बाबुराम भट्टराईया नेतृत्वय् दुगु वर्तमान सरकारयात राष्ट्रिय सहमतिया सराकर दयेकेगु ज्या जुइ हे मखु धकाः धयादीगु दु । एमालेया नेता खनालं धयादिल 'राष्ट्रिय सहमतिया सरकार दयेकेगु बारे जिमि दथुइ सहमति जूगु दु ।
न्हय्गू बुँदाया सहमतिं छर्लङ यानाः ब्यूगु दु तर उकिया बारे विस्तृत सहलह जुइ धाःसा ल्यं दनि । याकनं हे सहलह ब्याकाः निष्कर्ष पिकायेगु जुइ ।'

प्रधानमन्त्रीं थ्व हे सर—कायात राष्ट्रिय सहमतिया सरकारय् रुपान्तरण यायेगु जुइ धकाः गुगु कथं न्वंवानादीगु दु उकिं यानाः झन समस्या वयेमफु धकाः नं वय्कलं धयादिल । एमालेया नायः झलनाथ खनालं धयादिल 'थ्व सहमतिं सामन्य दिशाबोध याःगु दु, यक्व हे खँ क्वःछिइगु आः ल्यं दनि । आः छु यायेगु धैगु विषयलय् थ्वहे मंसीर १४ गते छु यायेगु धकाः निष्कर्षय् थ्यंकेगु जुइ ।' वय्कलं थःगु हे प्रस्ताव कथं लिबाक्क हे जूसां सहमति जूगु दु धकाः नं दावी यानादिल । एमाले व नेपाली कांग्रेसया नेतातय्सं ७ बुँदाया सहमति धैगु शान्ति प्रक्रियाया नितिं जक मखु सरकारया विषयसं नं खः धकाः सार्वजनिक रुपं न्वंवानादीगुलिं थ्व एमाले कांग्रेसया डिजाइन कथं माओवादीया लडाकुत नं समायोजन यायेगु अले सरकार नं हिलेगु डिजाइन मखुला धकाः मनूतय्सं न्ह्यसः थानाहःगु दु ।