वैद्यया लडाकुत सेनाय् मवनीगु

समायोजनय् मवँसे अवकाश कयाः राजनीतिइ वयेगु तयारी

येँ (सन्ध्या टाइम्स)/एकीकृत माओवादीया बरिष्ठ उपाध्यक्ष मोहन बैद्य किरण पक्षधर लडाकुतय्सं सेना समायोजनाय् समावेश जुयाः सेनाय् प्रवेश जुइगु स्वयां नं स्वेच्छिक अबकास कयाः राजनीतिइ हे सक्रिय जुइगु तयारी यानाच्वंगु खँ सीदुगु दु ।

बैद्य पक्षं प्यंगू दल दथुइ जूगु ७ बुँदाया सहमतियात विरोध याना वयाच्वंगु दुसा बैद्य पक्षया लडाकुतय्सं नं उकिया विरोध यासें पत्रकार सम्मेलन तकं यायेधुंकूगु दु।
वैद्य पक्षं शान्ति सम्झौताय विरोध याःगुलिं वहे सम्झौता अन्तर्गत जुइगु सेना समायोजनय् वैद्य पक्षया लडाकुतय्सं ब्वति मकायेगु मानसिकता दयेकूगु खः। उकिया पलेसा बरु स्वैच्छिक अवकास कयाः राजनीतिइ हे सक्रिय जुइगु तयारी आपालं लडाकुतय्सं याःगु खः।
बैद्य पक्षया पोलिटब्यूरो दुजः धर्मेन्द्र बास्तोलां केन्द्रीय कमिटीं ७ बुँदाया सहमति भिंकेगु वा खारेज यायेगु ज्या मयात धाःसा थःपिनिगु पक्षया लडाकुतय्त सेनाय् दुहां मवँसे स्वेच्छिक अवकाश कायेत आह्वान याइ धयादीगु दु ।

वय्कलं संचारकर्मीतय्त धयादिल 'विरोध याये धुंकाः समायोजनाय् वनेगु खँ हे जुइ मखु। निर्णय भिंकेगु ज्या मजुल धाःसा स्वेच्छिक अवकाशय् वनेगु लडाकुतय् इच्छा दु ।'

बैद्य पक्षया मेम्ह पोलिटब्यूरो दुजः हरिभक्त कँडेलं याकनं हे थुकिया बारे औपचारिक खँ जुइ धासें कनादिल, 'आः पासापिंलिसे टेलिफोनं खँ जुयाच्वंगु दु, याकनं हे औपचारिक रुपं सहलह जुइ।'
बैद्य पक्ष मेम्ह नेता खड्गबहादुर विश्वकर्मां ला आःया प्रक्रिया प्रति हे असहमति दुगुलिं स्वेच्छिक अवकास तक नं मकासे तत्काल हे लडाकुत शिविरं पिहां वयेफु धकाः नं धयादिल ।

थ्वहे दथुइ सेना समायोजनया सवालय् लडाकुतय्सं वइगु केन्द्रीय कमिटीया बैठकय् सर्वसम्मतिं नर्णय यायेत नेतातय्त दबाव बीगु तयारी यानाच्वंगु दु ।

अवकास सिबें सेना वनीपिं अप्वः
सेना समायोजन प्रक्रियायात वैद्य पक्षं बहिष्कार यायेगु धाःसां नं आः जुइगु लडाकुया वर्गीकरणय् अवकास काइपिं व पुनर्स्थापनाय् वनीपिं सिबें नं नेपाली सेनाय् समायोजन जू वनीपिं लडाकुतय् ल्याः हे अप्वः दइगु खने दयाच्वंगु खँ सूत्रं धाःगु दु। थीथी शिविरय् च्वनाच्वंपिं झिंगुद्वः लडाकु मध्ये ६५०० म्हेसित जक नेपाली सेनाय् समायोजन यायेगु सहमति जूगु दु। तर पुनः वर्गीकरणया ज्या न्ह्याइबलय् थ्व स्वयां नं अप्वः लडाकुं सेनाय् वनेगु इच्छा प्वंकेफु। अथे जुल धाःसा अप्वःपिंत छु यायेगु धइगु सवालय् हानं मेगु मापदण्ड निर्धारण याये मालीगु खँ माओवादी नेतातय्सं धाःगु दु। लडाकुया पुनः वर्गीकरणया लागिं २१० म्ह सर्वेकर्तातय्त हानं तालिम बियाः परिचालन याइगु जूगु दु ।