विज्ञ पुचः बारे नेवाः सभासद्लिसे सहलह
येँ (सन्ध्या टाइम्स)/नेपाःया न्हूगु संविधान निर्माणया सवालय् ततःधंगु स्वंगू राजनीतिक दल व मधेसी मोर्चाया शीर्ष नेतातय्सं राज्य पुनर्संरचनाया निंतिं विज्ञ पुचः स्वनेगु धकाः याःगु सहमतियात कयाः नेवाःतय् सरोकार क्यनेगु झ्वलय् कंस २३ गते रणनीतिक सहलह ब्याकीगु जूगु दु ।
नेवाः स्वायत्त राज्य मंकाः संघर्ष समितिया थौं च्वंगु बैठकं विज्ञ पुचःया बारे नेवाः सभासद्तलिसे सहलह ब्याकेगु निर्णय याःगु खः। राज्य पुनर्संरचनाय् नेवाः स्वायत्त राज्य सुनिश्चित जुइमाःगु खँय् नं उकी सहलह जुइ धाःगु दु। उगु सहलह लिपा नेवाःतय्गु प्रतिनिधिमण्डल वनाः संविधानसभाया अध्यक्ष सुवास चन्द्र नेम्वाङयात ज्ञापन पौ बीगु नं ग्वसाः दु ।
अथे हे नेवाः स्वायत्त राज्य मंकाः संघर्ष समिति व आदिवासी जनजाति संयुक्त संघर्ष समिति जानाः मंसीर ५ गते राष्ट्रिय सभागृहय् बृहत् अन्तर्क्रिया यायेगु नापं उगु ज्याझ्वलय् एकीकृत माओवादीया अध्यक्ष प्रचण्ड, कांग्रेसया सभापति सुशील कोइराला, एमालेया अध्यक्ष झलनाथ खनाल, संविधानसभाया अध्यक्ष सुवासचन्द्र नेम्वाङ नापं मेमेगु दलया नेतातय्त पाहां कथं ब्वनाः नेवाः स्वायत्त राज्यया सवालय् दबाव बीत्यंगु दु ।
थ्वहे दथुइ आदिवासी जनजाति न्ह्यलुवातय्सं नं विज्ञ पुचः बारे सरोकार क्यनाहःगु दुसा नेपाल आदिवासी जनजाति महासंघया महासचिव आङकाजी शेर्पां विज्ञ पुचःया आवश्यकता मदु धयादीगु दु ।
