दुर्घटनाय् ६ म्ह मंत, १२ म्ह घाःपाः
येँ (सन्ध्या टाइम्स)/थौं सुथय् सुनसरीया मधेसा लागाय् विपरित दिशां वयाच्वंगु यात्रुबाहक बस व माइक्रोबस ठक्कर नयाः खुम्ह यात्रु सीगु दुसा मेपिं १२ म्ह घाःपाः जूगु दु ।
विराटनगरं गाईघाटपाखे वनाच्वंगु ना. ३ ख ३१४१ नम्बरया बस व इनरुवां ईटहरीपाखे वनाच्वंगु को. १ च ९३० नम्बरया माइक्रोबस थौं सुथय् १० बजे ठक्कर नयाः दुर्घटना जूगु खः। उकी लानाः माइक्रो बसय् च्वनावःपिं खुम्ह मनू सीगु खः। सीपिं मध्ये प्यम्हेसित म्हसीके फुगु दुसा निम्हेसित म्हसीके मफुनि। सीपिं यात्रुत मधेशाया रत्नबहादुर बिष्ट, ४५ दँया डम्बरकुमारी कार्की, ६० दँया बीरबहादुर कटुवाल व भादगाउँ सिनुवारीया ४० दँया रजीया मल्लिका खः धाःगु दु।घाःपाः जूपिं मध्ये गम्भीर अवस्थाय् लानाच्वंपिं स्वम्हेसित धरानय् व मेपिं प्यम्हेसित विराटनगरय् वासः याके यंकूगु दु। मेपिं सुनसरी अस्पतालय् सामान्य वासः यानाः लिहांवंगु दु ।
