लुँकु फल्चाय् शंखधर दिवस
येँ (सन्ध्या टाइम्स)/शंखधर साख्वाः दिवसया लसताय् येँया २० वडा स्थित मरु त्वालय् शंखधर साख्वाः दिवस लिसें भिंतुना ज्याझ्वः जुल। मरुत्वाः पुचः टोल सुधार समिति व लुँकु फल्चा संरक्षण समितिया ग्वसालय् जूगु उगु ज्याझ्वलय् सभासद् बुद्ध साय्मि मू पाहां कथं झाःगु खः ।
ज्याझ्वलय् सभासद् साय्मिं पुर्खायात लुमंकेगु धइगु हे झीगु म्हसीका व प्रतिनिधित्व ब्वयेगु खः धासें देय्, राज्य व नेपाल संवत्यात म्वाकेगु हे झीगु गौरब खः धयादिल।
माओवादी नेता सर्वोत्तम डंगोलं जातीय स्वशासन मवःतले संविधानयात लिछ्याना हे तयेमाःगु खँ कनादिल। नेपालभाषा मंकाः खलःया छ्यांज्ये नरेशवीर शाक्य, डा. चुन्दा बज्राचार्यपिंसं भिंतुना बियादीगु उगु ज्याझ्वलय् देवरत्न ताम्राकारं सुभाय् बियादीगु खः ।
शंखधर साख्वाःलिसे स्वापू दुगु लुँकु फल्चायात सर्वोत्तम डंगोलया पहलय् येँ मनपाया ग्वाहालिइ जीर्णोद्धार याःगु खः। शंखधर साख्वाः २० वडा निबासी जूगुलिं वय्कःयात लुमंकेगु ताः तयाः न्हापांखुसी लुँकु फल्चाय् शंखधर दिवस हंगु खः। नेपाल ललितकला प्रतिष्ठानया कुलपति किरण मानन्धर, स्यस्यः समाजया नायः भरतलाल स्यस्यःपिं नं उपस्थित जुयादीगु उगु ज्याझ्वः मरु त्वाः पुचःया सल्लाहकार उदय ताम्राकारया सभापतित्वय् न्ह्याःगु खः ।
