चारुमती विहारय् राष्ट्रपतिपाखें कथिन चीवर दान
येँ (सन्ध्या टाइम्स)/चारुमती बुद्धिष्ट मिसन नेपालया अध्यक्ष नापं श्री अशोक चारुमती स्टूप विहारया प्रमुख भिक्षु तपस्सीधम्म वर्षावास क्वचायेका बिज्याःगु लसताय् राष्ट्रपति डा. रामवरण यादवपाखें पवित्र कथिन चीवर दान जुल। अशोक चारुमती स्टूप विहारया ग्वसालय् जूगु ज्याझ्वलय् राष्ट्रपति डा. रामवरण यादव लिसें मलेसियाया दातापिं चीफ अवत भिक्खुनी, सीक ली सेङ्ग, भिक्खुनी, सेक, सी.क्वेन, भन्ते मेन अमरसीट (श्रीलंका) भाजु लीम किम चाउ, भाजु हाउ हान सिअङ्ग, भाजु वोङ्ग, येन, चोनपिं व वय्कःया छेँजःपिंपाखें भिक्षु संघयात पवित्र कथिन चीवर दान याःगु खः। वय्कःपिंसं मूपाहां राष्ट्रपतियात नं धर्म उपहार लःल्हाःगु खः ।
ज्याझ्वलय् पाहां नापं पुलांम्ह मन्त्री हिसिला यमिं नं भिक्षु संघयात अष्ट परिस्कार दान यानादीगु खः। उपासक उपासिकापिंसं नं अष्टपरिस्कार दान याःगु खः।ज्याझ्वलय् भिक्षु भद्दियं धर्म देशना नापं कथि चीवर दानया महत्व कनाबिज्याःगु खः। भिक्षु गुणघोषपाखें शील प्रार्थना व बुद्ध पुजा याना बिज्याःगु खःसा भिक्षु मैत्रीयपाखें कथिन चीवर दानस्तोत्र पाठ यानाबिज्याःगु खः। ज्याझ्वलय् सभासद् लक्ष्मण घिमिरे, थाइल्याण्ड, म्यानमार, श्रीलंका, जापानया राजदूत लगायत आपालं भिक्षु भिक्षुणी व उपासक उपासिकापिनिगु उपस्थिति दुगु खः। चारुमती बुद्धिष्ट मिसनया परमानन्द शाक्यं लसकुस यानादीगु उगु ज्याझ्वलय् भिक्षु तपस्सीधम्मं कृतज्ञता प्वंकाबिज्याःगु खः ।
