राज्य पुनर्संरचना व विज्ञतय् पुचः

राज्य पुनर्संरचना सम्बन्धी ज्याया निर्णय यायेत विज्ञतय् पुचः दयेकेगु धकाः संविधानसभाया छगू समितिं नकतिनि निर्णय याःगु दु। थ्व स्वयां न्ह्यः थुकिया बारे छगू आयोग गठन यायेगु व वहे आयोगं बिउगु सिफारिसया लिधंसाय् निर्णय यायेगु धयातःगु खः। तर राजनीतिक पार्टीतय्सं आयोग गठनय् ध्यान हे मबिउ। जब संविधानसभाया राज्य पुनर्संरचना सम्बन्धी उपसमितिं थम्हं हे राज्य पुनर्संरचनाया छगू खाका तयार यानाः पारित समेत यात, वयां लिपा राज्य पुनर्संरचनाया विरोधीतय्सं थ्व ज्या संविधानसभां यायेगु मखु, आयोग हे गठन यानाः यायेमाः धकाः माग याना हल। माओवादी व मेपिं जनजाति सभासद्तय्सं आयोग गठनया खँयात विरोध यात। उकिया हे लिच्वः कथं आः विज्ञतय् पुचःया खँ वःगु खः। संविधान सभां राज्य पुनर्संरचना सम्बन्धी छुं ज्या मयाःनिगु इलय् खःसा विज्ञ पुचः गठन याःगुया नं अर्थ दइगु खः। राज्य पुनर्संरचनाया ज्या यायेधुंकाः विज्ञ पुचः गठन याये धाःगुलिं आः थ्व पुचलं छु ज्या याइ व वं बिउगु सुझावयात संविधानसभां माने याये मालीगु खः लाकि धइगु विवाद ब्वलंगु दु। दकलय् न्हापां ला थ्व विषयया विज्ञ धाःपिं सु सु खः? उकी मध्ये सु सु तयेगु? उमिगु मापदण्ड छु छु खः? मू विवाद ला थनं हे पिहां वइ। विज्ञत नं दलतय्सं कोटा प्रणालीं हे नियुक्ति यायेगु खःसा उमिसं दलतय् निर्देशन कथं हे सुझाव बीगु खँय् विवाद मदु। उकिं विज्ञतय् पुचलं गज्याःगु सुझाव बी धइगु खँ उकिया गठनं हे सी दइ। अतः विज्ञ पुचः गठनयात नेवाः लगायत सकलें जनजातितय्सं सतिक हे च्वनाः ध्यान बीमाःगु अतिकं जरूरी दु ।

More Stories Like this