थुकथं क्वचाल हलिं नेवाः तःमुँज्या
सुभाषराम प्रजापति
वर्ल्ड नेवाः अर्गनाइजेशन व पासा पुचः गुथि यूकेया मंकाः ग्वसालय् न्हापांगु हलिं नेवाः तःमुँज्या बेलायतया लण्डनय् थ्वहे अक्टोबर २९ निसें ३१ तक झःझः धायेक क्वचाल।
न्हापांगु न्हि: उलेज्या:
स्वन्हुयंकं न्ह्याःगु तःमुँज्याया उलेज्या संस्कृतिविद् डा. सत्यमोहन जोशीं यानादीगु खः। ज्याझ्वः उलेज्या यासें भाजु जोशीं पिने च्वंपिं नेवाःतय्सं थःगु भाय् व संस्कृति विषयय् क्यंगु चिउताःयात च्वछायादिल। उलेज्याझ्वलय् मू न्वचुमि कथं प्रो. माणिकलाल श्रेष्ठं नेवाः जातिया इतिहासयात कयाः न्ववानादीगु खः। अथे हे ज्याझ्वलय् नेपालभाषा मंकाः खलः येँया नायः पद्मरत्न तुलाधरं थुगु हलिं नेवाः तःमुँज्या आयोजना स्वयम् हे नं सफलता जूगु खँ न्ह्यथनादिल ।
उलेज्याझ्वलय् नेपाःपाखें झाःपिं पाहांपिं नेवाः न्ह्यलुवा डा. महेशमान श्रेष्ठ, नेपालभाषा केन्द्रीय विभागया प्रमुख प्रो. प्रेमशान्ति तुलाधर, नेवाः अर्गनाइजेशन अफ अमेरिकाया नायः सिजन श्रेष्ठ, वर्ल्ड नेवाः अर्गनाइजेशन तदर्थ समितिया न्वकु डा. बालगोपाल श्रेष्ठ, नेपाः राष्ट्रिय पार्टीया महासचिव डा. विजय सैंजु, साहित्यकार श्रीलक्ष्मी श्रेष्ठ, सभासद् भिक्षु आनन्दपिंसं न्ववानादीगु खः ।
ज्याझ्वलय् तःमुँज्याया कजि कृष्ण चखुंजुं न्हापांगु हलिं नेवाः तःमुँज्याया लागि नेपाःया राष्ट्रपति डा. रामवरण यादव, प्रधानमन्त्री डा. बाबुराम भट्टराई, उपप्रधानमन्त्री नारायणकाजी श्रेष्ठलगायत देशविदेशं वःगु भिंतुना सन्देश न्यंकादीगु खःसा पाहांपिं डा. सत्यमोहन जोशी, प्रो. माणिकलाल श्रेष्ठ व बेलायतया लागि नेपाःया कार्यवाहक राजदूत अम्बिका मानन्धर लुइँटेलं नेपालभाषाया थीथी झिगू कृति (म्येँचाः, सफू आदि) विमोचन यानादिल।
पासा पुचः गुथि यूकेया सल्लाहकार अर्जुन प्रधानया सभापतित्वय् जूगु उगु ज्याझ्वलय् लसकुस न्वचु वर्ल्ड नेवाः अर्गनाइजेशन तदर्थ समितिया नायः दयारत्न शाक्यं बियादीगु खःसा सुभाय् न्वचु पासा पुचः गुथि यूकेया नायः डा. सचेतन तुलाधरं बियादीगु खः। ज्याझ्वः कलाकार मनिष श्रेष्ठं न्ह्याकादीगु खः ।
विधान व न्हूगु ज्यासना पुचः ल्यज्या सत्र:
वर्ल्ड नेवाः अर्गनाइजेशनया विधान कवलं निर्माण याःगु विधान सन्दर्भय् प्रो. माणिकलाल श्रेष्ठया सभापतित्वय् जूगु सत्रय् विधान सम्बन्धी सहलह जुल। सहभागीपिनि दथुइ सहलह लिपा विधानय् छुं संशोधन सहित विधान पारित यायेगु ज्या जुल ।
विधान पारित जुइधुंकाः वर्ल्ड नेवाः अर्गनाइजेशनया न्हूगु ज्यासना पुचः ल्यज्या न्ह्याःगु खः। थुगु ल्यज्याय् सर्वसम्मतिं डा. बालगोपाल श्रेष्ठयात नायः ल्ययेगु ज्या जुल। वय्कःया नायःसुइ न्हूगु ज्यासना पुचः ल्ययेगु क्वःजिउसां पूर्ण रुपया ज्यासना पुचः धाःसा लिपा जक ल्ययेगु क्वःजिउगु खः ।
निन्हुगु दिं प्राज्ञ सभा:
तःमुँज्याया निन्हुगु दिंया न्हापांगु सत्रय् डा. सत्यमोहन जोशीया सभापतित्वय् प्राज्ञ सभा न्ह्यात। थुगु प्राज्ञ सभाय् थीथी ख्यःया विज्ञपिंसं थीथी विषयया ज्यापौ न्ह्यब्वयेगु ज्या जूगु खः ।
ज्यापौ न्ह्यब्वये स्वयां न्ह्यः पासा पुचः गुथि यूकेया नायः डा. सचेतन तुलाधरं लण्डन घोषणा पौया मस्यौदा न्ह्यब्वयादिल। न्ह्यब्वःगु मस्यौदाय् उपस्थिपिनि सहलह लिपा घोषणायात अन्तिम रुप बीत वर्ल्ड नेवाः अर्गनाइजेशन तदर्थ समितिया नायः दयारत्न शाक्य, हलिं नेवाः तःमुँज्याया कजि कृष्ण चखुं, नेवाः न्ह्यलुवापिं डा. महेशमान श्रेष्ठ व डा. विजय सैंजु यानाः प्यम्हेसिया छगू समिति नीस्वनेगु ज्या जुल ।
प्राज्ञसभाया सत्रय् दयारत्न शाक्यं 'नेवाः प्राज्ञिक अध्ययन', रामकुमार श्रेष्ठं 'बुद्धया जन्मभूमि लुम्बिनी', डा. विजय सैंजुं 'राजनीतिइ नेवाः व नेपाः राष्ट्रिय पार्टीया विकास', डा. महेशमान श्रेष्ठं 'नेवाः राजनैतिक अभियान', भन्ते आनन्दं 'नेवाः सामाजिक व राजनैतिक विकास', डा. बालगोपाल श्रेष्ठं 'नेपाल संवत् व व्यवहारिकता' विषयया ज्यापौ न्ह्यब्वयादीगु खःसा नेवाः विद्यार्थी दबूया नायः रीसा श्रेष्ठ, पासा पुचः बेल्जियमया पुलांम्ह नायः रविन्द्र श्रेष्ठ आदिपिंसं थःगु ख्यःया समसामयिक नेवाः विषयवस्तुइ न्ववानादीगु खः। थ्वयालिसें डा. डेभिड गेल्नरया रेकर्डित भिडियो प्रस्तुति नं जूगु खः। थुपिं सकतां प्रस्तुति लिपा न्ह्यसः लिसः व सुझाव मुनेगु ज्या जूगु खः ।
नेपाःलिसे प्रत्यक्ष सहलह:
निन्हुगु न्हिकुन्हु लण्डनय् तःमुँज्या जुयाच्वंगु इलय् लाक्क हे नेपाःया कुपण्डोलस्थित सातोआकि स्मृति हलय् नेवाःख्यःया न्ह्यलुवापिं दथुइ वर्ल्ड नेवाः अर्गनाइजेशनया विषयस सहलह व येँ अले लण्डनया दथुइ प्रत्यक्ष खँल्हाबल्हा यायेगु ज्या जुल। नेपाःपाखें खँल्हाबल्हाय् नेवाः देय् दबूया संरक्षक लक्ष्मण राजवंशी, नेपालभाषा मंकाः खलः येँया छ्यांज्ये नरेशवीर शाक्य, नेपाः राष्ट्रिय पार्टीया नायः डा. केशवमान शाक्य, नेवाः न्ह्यलुवापिं डा. चुन्दा वज्राचार्य, मल्ल के. सुन्दर, सुजीव वज्राचार्य, सुरेश मानन्धर आदि व्यक्तित्वपिनिगु उपस्थिति दुगु खः। नेपाःया थुगु ज्याझ्वः व उगु हे इलय् लण्डनय् जूगु ज्याझ्वः निगुलिं इन्टरनेट मार्फत लाइभ प्रसारण यायेगु ज्या जूगु खःसा टेली कन्फरेन्स मार्फत निगू स्वापू तयाः बिचाः न्ह्यब्वयेगु ज्या जूगु खः। थुगु प्रत्यक्ष सहलह ज्याझ्वः वर्ल्ड नेवाः अर्गनाइजेशन तदर्थ समितिया न्वकु सुवन् वज्राचार्यया सभापतित्वय् जूगु खः ।
साहित्य गोष्ठी:
सहलह ज्याझ्वः धुंकाः प्रो. माणिकलाल श्रेष्ठया सभापतित्वय् साहित्य गोष्ठी न्ह्यात। थगु गोष्ठीइ प्रो. प्रेमशान्ति तुलाधरं नेपालभाषा साहित्यया विकास विषयय् ज्यापौ न्ह्यब्वयादीगु खःसा साहित्यकारपिं गणेशराम लाछि, श्रीलक्ष्मी श्रेष्ठ, विमलप्रभा वज्राचार्य आदिपिंसं थःथःगु रचना पाठ यानादीगु खः। थुगु हे ज्याझ्वःया दथुइ लण्डनं पिदनाच्वंगु साहित्यिक व सांस्कृतिक स्वलापौ 'मतिना' या सम्पादक शशी महाजुयात भाजु डा. सत्यमोहन जोशीं पलिंगा न्ययेकाः हनादीगु खः ।
म्हपुजा ज्याझ्वः:
थ्वकुन्हु बहनी लण्डनया ह्यामरस्मीथ टाउनहलय् न्हूदँ ११३२ व म्हपुजा हनेज्याझ्वः जुल। यूकेया सलंसः नेवाःतय् उपस्थिति दुगु उगु ज्याझ्वलय् डा. सत्यमोहन जोशीपाखें 'गुथि' पौया विमोचन जूगु खः। थ्वयां लिपा डा. सत्यमोहन जोशी, प्रो. माणिकलाल श्रेष्ठ, प्रो. प्रेमशान्ति तुलाधर, डा. बालगोपाल श्रेष्ठ, अम्बिका मानन्धर लुइँटेल आदिपिंसं न्ववानादीगु खः। ज्याझ्वलय् पासा पुचः गुथि यूकेया नायः डा. सचेतन तुलाधरं लसकुस यानादीगु खःसा पासा पुचः गुथिया बोर्ड अफ ट्रष्टीया कृष्ण चखुंजुं सुभाय् देछानादीगु खः ।
औपचारिक ज्याझ्वः लिपा पुलुकिसि, भैलःप्याखं, ख्याःप्याखं, नेवाः म्येँ व थीथी प्याखं आदि दुथ्याःगु सांस्कृतिक ज्याझ्वः न्ह्यब्वसें नेवाः भ्वय् नं याःगु खः ।
स्वन्हुगु न्हि:
मुँज्याया स्वन्हुगु दिं पूर्वघोषित ज्याझ्वः कथं लण्डनया ब्रिटिश लाइब्रेरी, भिक्टोरीया एण्ड अलवर्ट म्यूजियमय् दुगु नेपाःया कलाकृति अध्ययन अवलोकन जुल। थ्वया लिसें लण्डनया मूमू आकर्षणया नं अध्ययन भ्रमण जुल ।
लण्डन घोषणा:
पूर्वप्रस्तुत लण्डन घोषणाप्रति सुझाव सहितया संशोधनया लागि गठन जूगु प्यम्हसिया छगू पुचलं लण्डन घोषणायात पूर्ण रूप बीधुंकाः नोभेम्बर १, २०११ मंगलवाः बहनी छगू बेलि ज्याझ्वःया दथुइ भाजु दयारत्न शाक्यं लण्डन घोषणा न्ह्यब्वयादिल। थुगु हे ज्याझ्वलय् वर्ल्ड नेवाः अर्गनाइजेशनं पिथंगु बुखँपौ भाजु सत्यमोहन जोशीया ल्हातिं विमोचन जुल। थ्व स्वयां न्ह्यः थुगु दिनय् नेवाः समाजशास्त्र विशेषज्ञ डा. डेभिड गेल्नरया ब्वनाय् अक्सफर्ड विश्वविद्यालयया अवलोकन भ्रमण नं जूगु खः ।
News Location:
Related Stories
न्हापांगु हलिं नेवाः तःमुँज्याया लण्डन घोषणा (दस्तावेज) विश्व नेवाः संगठनया नायलय् डा. बालगोपाल श्रेष्ठ सर्वसम्मत विश्व नेवाः सम्मेलनया झ्वलय् नेपाःपाखें टेलिकन्फरेन्सMore Stories Like this
जातीय संघीयताया खँय् नेमकिपा प्राडो, पाजेरो ब्वाकेगु ख्यः मखु राष्ट्रपति प्रणाली बारे विवाद नेवाःतय्त जागृत याइगु 'नेपाःमिया नुगः सः' खँ स्वनिगःया
