विपाया विवादय् तक्यंम्ह बाबुराम

दिल साहनी

विपा विवादया कारण प्रधानमन्त्री डा. बाबुराम भट्टराई प्रसंशकतय्गु दथ्वी नं कटु आलोचक व्यक्ति जूवंगु दु । आम नेपाःमितय्गु नितिं जक मखु माओवादी पार्टीया नितिं नं तसकं चिउताःया विषय जूवंगु दु । माओवादी नायः पुष्पकमल दाहाल प्रचण्ड प्रधानमन्त्री जुयादीवलय् अर्थमन्त्री जुयादीम्ह डा. भट्टराईं यक्कों नां नं कमय् याःगु खः । छम्ह सफल अर्थमन्त्रीया रुपय् कायेगु नं याःगु खः । माओवादी मोर्चानाप प्यंगू बुंदे सहमति यानाः देशया स्वीन्याम्हम्ह प्रधानमन्त्री जुयादीम्ह डा. भट्टराई स्वदेशी सामान छ्यलेत हःपाः वीगु झ्वलय् मुस्ताङ्ग गाडी गयादीम्ह प्रधानमन्त्री डा. भट्टराईं भारतयात लय्तायेकेत मिखा निप्पां तिस्सिनाः विपा सम्झौताय् सइछाप याना वयेवं राष्ट्रघातीया द्वपं फयाच्वनेमाःगु दु । विपरित छुंनं सन्धि सम्झौताय् ल्हाःचिं मतयेमा धकाः मयायेमा धकाः चाहेजूगु खः । पार्टी व जनतायात अथ्य छु यायमखु धकाः बचं नं व्यूगु खः । तर डा. भट्टराईं अःखतं गुगु यायेमते धाल वहे यानांतुं वल । विवादीत डा. भट्टराईं आः झनहे विवादय् लाःगु दु । प्रभु शाह व शरदसिंह भण्डारीया राजिनामा -?) लिपा भचा राहतया अनुभूति व्यूगु लिपा हानं विपाया कारणं डा. भट्टराईं आहत जूगु दु ।

प्रधानमन्त्री डा. भट्टराइ न्हापा गुलि बांलाःगु छबि दयेकेत ताःलाःगु खः, प्रधानमन्त्री जुइ धुनेवं व छबि बुलूगु दु । लोकपि्रयं अलोकपि्रय जुयादीगु दु । लोपोन्मुख जाति राउटेपिन्त नाप मलासे इमित तंचायेकादीम्ह डा. भट्टराई थुकिं यानाः नं आलोचनाया पात्र जुयादिल । थःम्हं धयागु इलय् शान्ति प्रकृया पूवंकेत व स्वलाया दुने संविधानया न्हापांगु मस्यौदा जनताया न्ह्यःने तयेगु दावा याःसां नं उकियात पूवंकेमफूगु सन्दर्भय् खँ हिकल धकाः नं आलोचना पात्र जुयादिल । वयकः सेना समायोजनया न्ह्यसलय् सिन्का छपु नं मत्वः थःगु सन्दर्भय् वैद्य पक्षपाखें आलोचित जुयादिल । खँ छु धाःसा शान्ति प्रकृयाया न्ह्यसलय् डा. भट्टराई थःगुहे पार्टी नापं सहमति कयाः न्ह्याः वनेगु सवालय् विफल जुल । आः वयाः वयकः भारतया प्यन्हुया सद्भावना भ्रमणया इलय् बिपाय् हस्ताक्षर यानाः अझ अप्वः आलोच्य जुयादीगुया दीगु राष्ट्रघाती नापं धायेकेगु ज्या जुल । अथ्यला भारतीय पूँजीयात नेपालय् दुतहयेगु थ्व सम्झौता छुंनं हालतय् राष्ट्रघाती मखु धयागु वयकःया बल्लाःगु दावी दु । यदि खँ अथ्य खःसा वयकःनं उगु सम्वन्धय् देशयात चित्त बुझय् यायेमाल । तर वं थुगु मामिलाय् जनताया चित्त बुझय् यायेगु सम्भव खनेमदु । अप्वः सम्भव दु, थ्व विपां भट्टराइया छवीयात धराशायी दयेकावी ।

नेपाली उखान नं दु लाता त्यांग्रा पुली छक्वः बाठो त्यांग्रा पुली झिक्वः । झीत ग्यासे वः गनं झीसं विश्वय्हे अब्वल दर्जायागु वुद्धिजीवी विद्वान व चलाख व्यक्तित्व धयातःम्ह डा. भट्टराईं थः स्वयाः हजार गुना धूर्त भारतीय शासकतय्गु माकः जालय् जक तमक्यंला ? गनं नेपाःया म्हो जक चलाख व विद्वान नेपाली शासकतय्त विपाया माध्यमं डा. भट्टराइयात लासाय् ला मथ्यंला ? न्ह्यसः दनावःगु दु । नेपालं थुगुकथं विपाय् छाय् थुलि याकनं हस्ताक्षर यात ? विपक्षतय्तला त्वःते खुद थःगुहे पार्टी दुने सहमति मयासे थुलि हत्थासं विपाय् हस्ताक्षर यात ? डा. भट्टराईं पूँजीवादी लँपुइ वन खुद पार्टीयात तकं पूँजीवादी पार्टी यानाविल । मजदुर किसानया पार्टी मखु, पूँजीपति वर्गया पार्टी यानादिल । माओवादीया वैद्य समूहं अले एमालें थुगु विपा सम्झौताया विरोध यात यात । नापं नेपाली कांग्रेसया छुं छुं नेतातय्सं नापं राष्ट्रघाती जूगु अभिव्यक्ति विल । समर्थन याःपिसं नं थःपिसं छुं यायेगु हिम्मत मदुगुलिं हे डा. भट्टराइया समर्थन याःगु खनेदु । विपाय् हस्ताक्षर यानाः डा. भट्टराइ बल्लाःगु मदु, कमजोर जूगु दु । वयकः नं छगू पक्षया विश्वास काःसां मेगु पक्षया विश्वास तंकूगु दु । विपाय् ल्हाःचिं तयेगु जोखिम दु धयागु खँ वयकःनं ल्हाःचिं तयेधुंकाः व्यूगु अभिव्यक्तिं स्पष्ट जुइ । उकिं नेपालय् विपाया विरोधय् सामना वयकः नं यायेहेमाः । निश्चितरुपं विदेशी लगानी दुतहये माः । तर गुज्वःगु लगानी दुतकायेगु व गुलि लगानी दुतकायेगु धयागु खँ राष्ट्रिय आवश्यकता व सहमतिया आधारय् जुइमाः । विदेशी लगानीं नेपाली उद्योग धन्दायात लिधँसा वीगुकथंया जुइमाः । उकियात नुनिगु कथंया जुइमज्यू । विदेशी लगानी थःगु देशं पचय् यायेफैगु कथंया जुइमाः ।

भारा जुइगु व ज्यानहे वनीगु कथंया जुइमज्यू । थौं तक्क नेपाली शासकतय्सं भारतनाप गुलि सन्धि, सम्झौता याःगु दु, व राष्ट्रघाती कथंया दु धयागु खँ मचा मचातय्सं स्यू । कोशी निसें महाकाली तक्क गुलिनं सम्झौतात जुल व राष्ट्रघाती खः धयागु खँ नेतातय्सं मथूसां जनतां बांलाक थुइकूगु दु । भोगय् याःगु दु । विपाय् निगू देशया पूँजीपतिया थःथःगु देशय् विपा अन्तरर्गत तयाः उद्योग धन्दा चायेकेगु अधिकार व्यू थें च्वंसां नं थ्व भारतया हितय् जक सोचे यानातःगु दु । नेपालय् गुलिनं पूँजीपति भारतय् लगानी यायेत वनी ? गुलि नेपाली पूँजीपतिं विपां फाइदा कायेफै । सत्यला थ्व खःकि विपां नेपाली लगानीकर्तायात गंकेगु व भारतीय लगानीकर्तायात गंकेगु व भारतीयतय्त ल्होंकेगु मौका व्यूगु दु । भारतनाप जूगु विपा सम्झौता धुं व च्वलय्चित छगूहे घाटय् यंका लः त्वंकेगु ज्या खः । विदेशी लगानी उगु हदतक्क स्वागत योग्य, गुगु हदतक्क थुकिं राष्ट्रिय पूँजी व उद्योगधन्दायात लिधँसा बिइ । राष्ट्रिय पूँजीयात टाट् पल्टय् यायेगु व राष्ट्रिय उद्योगधन्दायात धराशायी यायेत विदेशी लगानी थ्व देशया नितिं अभिशाप जुइफु । भारतं थःगु हित अःखः छुंनं ज्या याइमखु । भारतीय स्वार्थयात रक्षा यायेगु ज्याय् भारतया शासक वर्ग न्ह्यावलें सतर्क व सजग दु । तर नेपाली शासक न्ह्यावलें नं भारतया न्ह्यःने पुलिं चुयाच्वंगु दु । थुगु इलय् विपाय् सही यायेवलय् डा. भट्टराईं नं भचा मचा जक जूसां नं छाय् पुलिं चूगु दु धाःसा वं भारतं वंगु व्यापारितय् त्यासा हयेगु, दोहोरो कर प्रणाली खारेज यायेगु व भारतं विजुली आपूर्तिया मात्रा अप्वयेकेगु सन्धि लाय् थःम्हं दावी याःथें भारतीय शासक वर्गयात हेके फूगु मदु । राजियाकेफूगु मदु । मात्र उधारो आश्वासन कयाः खाली ल्हातं लिहां वःगु दु । खँ उलि जक मखु वयकःनं भारतीय सीमा अतिक्रमणया न्ह्यसलय् तसकं सः थ्वयेकेफूगु मदु । भारतं भुटानी शरणार्थीया स्वदेश लितछ्वयेगु सन्दर्भय् लँ पंगु खँ ल्होनेतकं आँ मयाः, यायेमफु ।

विपा सम्झौता भारत त्याःगु दुसा नेपाः वूगु दु । विपाय् सहि छाप याकाः प्रधानमन्त्री डा. भट्टराइया लोकपि्रयता म्हो यानाव्यूगु जक मखु खुद माओवादी पार्टीयात नं वदनाम याकेत छुं हद तक्क ताःलाःगु दु । डा. भट्टराईया भारत भ्रमणं भारतं छु ल्हातय् लाकूगु दुसा नेपालं छुं तंकूगु दु । थुगु सम्झौता लिपानं भारत छु खँ सीकेमाः धाःसा भारतया स्वार्थया नितिं नेपाःया शासकतय्त हेयेकाः ख्यानाः पुलिं चुइकूसां नेपाली जनताया चाहना व भावना अले हितया रक्षा यानाः जक धात्थेंगु हित जुइ । थ्व खँयात चीनं बांलाक थुइकूगु दु । भारतं नं थुइकेगु बांलाइ । जनताहे निणर्ायक शक्ति जूगुलिं जनता हित धयागु धात्थेंगु हित खः ।

More Stories Like this