पर्यटन दँय् पर्यटकतय्त दुःख

नेपाल सरकारं सन् २०११ यात पर्यटन दँ धका घोषणा याःसां नेपालय् वःपिं पर्यटकतय्त दुर्गम थासय् अलपत्र यायेगु ज्या जूगु दु । मौसमंया अवस्था बांमलायेवं सोलुखुम्वुया लुक्लाय् वंगु न्हय्न्हुंनिसें स्वद्वःत्या पर्यटकत अलपत्रय् लानाच्वंगु दु । वंगु न्हयन्हुं निसें लुक्लाय्हे च्वनाच्वने मालेवं अन नये त्वनेगुनापं समस्या जुयाच्वंगु धाःगु दु । अनच्वच्वं अल्पकालिनरुपय् नेपाः चाःह्यूवंपिं सुंसुं पर्यटकतय्गु भिसाया म्यादनापं फूगु दु । स्वतन्त्ररुपं चाह्यूवंपिं पर्यटकतय्गु खल्ति नापं खाली जुइधुंकूगु धाःगु दु । देनेगु थाय् मदयाः चिकुलाया इलय् नं खुल्ला आकास क्वय् देनेत वाध्य दु । पर्यटन दँ ताःलायेमा यक्को विदेशीत दुहां वयेमा धकाः प्रचार प्रसारय् जक करौडौं ध्यबा लगानी याइम्ह नेपाल सरकारं थुखेपाखें छुंहे ध्यान व्यूगु मदु । लुक्लाय् विमान मब्वयाः छवाःनिसें स्वद्वःत्या पर्यटकत अलपत्रय् लानाच्वंसां सरकारं ध्यान वीफूगु मदु । वा धकाः सःतेगु, वलकि समस्याय् लाःपिनिगु वास्ता मयायेगु खःसा सरकारं थ्व दँयात पर्यटन दँ धकाः छाय् घोषणा यायेमाःगु ? सामान्यरुपं पर्यटकत वयाच्वंगु दयेक दयेकं १० लख पर्यटकतय्त दुतहयेगु धकाः ग्वसा ग्वइम्ह सरकारं समस्याय् लाःपिं पर्यटकतय्त स्वयेमाःगु खःलाकि मखु ? पर्यटकतय्त दुत हयेत करौंडौं लगानी यायेगु अले देशया दुने उखे थुखें अलपत्रय् लाःपिं पर्यटकतय्त फुसा विमान चार्टर यानाः येँय् हयेकेमाः, मखुसा थ्व स्वद्वःत्या पर्यटकतय्सं थःगु देश लिहां वनाः इमिसं सकारात्मक मखु नकारात्मक प्रचार प्रसार मयाइ हे मखु । थुगु समस्यायात फक्को म्हो यायेगु विचाः यायेमाः ।

वंगु दँय् नं नोभेम्वर महिनां नं लुक्लाय् स्वद्वः मनूत अलपत्रय् लाःगु खः । अवले नेपाली सेना व निजी हवाइ कम्पनीया हेलिकोप्टर पर्यटकतय्त ल्हययेगु ज्या याःगु खः । अवले उगुकथं उद्धार याःम्ह सरकारं थुगसी छाय् सम्क च्वनाः तामाशा स्वयाच्वन ? मनूतय्सं न्ह्यसः थनेगु यानाहःगु दु ।

मौसमया अवस्था प्रतिकुल जुइवं नियमित विमान ब्वयेगु ज्या वन्द जुयाच्वंगु दु । निजी विमान कम्पनीत डाइनेस्टी, सिमि्रक, माउन्टेन आदिं अन अलपत्रय् लानाच्वंपिं पर्यटकतय्त हयेत स्वःसां हेलिकप्टरया क्षमता स्वयाः अप्वः पर्यटकतय्गु हुल दुगुलिं तमं मि जुयाच्वंपिं पर्यटकतय्गु दथ्वीइ ल्वापु जुइगु यानाच्वंगु खः । वंगु सञ्चवाः जक अथ्य चिग्वःगु हेलिकप्टरं सत्या पर्यटकतय्त येँय् हयेत ताः लाःगु खः ।

मौसम बांमलाःगु कारणं नियमित उदानय् बांमलाक्क प्रभाव त्वःतूगु दु । भैरवा, नेपालगञ्ज, विराटनगर, जनकपुर, भरतपुर लगायतया नियमित उदान रद्ध जूगु खः । पोखराय् नं वंगु निन्हु थुखे छगू हे विमान मब्वः, वंगु सञ्चवाः जक बुद्ध, यती, गुण व अग्निं छगू छगू उडान याःगु खः । मौसमयाहे कारणं मुस्ताङ्गय् नं विमान मब्वः । खसु वयाच्वंगु कारणं विमान सेवा वन्द जुयाच्वंगु खः । मौसमया कारणं विमान ब्वयेके मफयेवं पर्यटकत धमाधम सतक मार्गं वनेत स्वयाच्वंगु दु । हवाई मार्गया विकल्पकथं सतक मार्ग छ्यलीगु खः । तर लुक्लाय् थ्व सुविधा नं बांमलाकं उलपब्ध मजू । पर्यटन दँ घोषणा याःथें दुहां वइपिं पर्यटकतय्सं माःगु इलय् माःगु सेवा नं वीफयेमाः । मखुसा थुकिं नकारात्मक लिच्वः त्वःतेफु ।

More Stories Like this