विज्ञ पुचः अनावश्यक : जनजाति

श्रीकृष्ण महर्जन

ततःधंगु स्वंगू राजनीतिक दल व मधेसी मोर्चाया शीर्ष नेतातय्सं वंगु कार्तिक १५ गते बहनी राज्य पुनर्संरचना यायेत विज्ञतय्गु पुचः दयेकेगु नापं मेमेगु विषययात दुथ्याकाः ७ बुँदाया गुगु कथं सम्झौता यात उकियात कयाः नेपाःया आदिवासी जनजाति नापं राज्यं बहिस्करणय् लाकातःपिं समुदायया नेतातय् सरोकार क्यनाहःगु दु । नेपाःया आदिवासी जनजातितय्गु मंकाःगु संगठन नेपाल आदिवासी जनजाति महासंघया मूछ्याञ्जे आङकाजी शेर्पा, आदिवासी जनजाति दलित गणतान्त्रिक मोर्चाया नायः किशोर कुमार विश्वास, आदिवासी जनजाति वृहत्त मोर्चाया छ्याञ्जे प्रा. डा. कृष्णबहादुर भट्टचन नापं मेमेपिं नेतातय्सं झीगु स्वनिगः न्हिपौलिसे खँल्हासें तप्यंक हे विरोध यानाहःगु दुसा नेवाःतय्सं धाःसा थःपिनिगु सरोकार क्यनेगु धकाः धाःगु दु ।

जनजाति महासंघया मूछ्याञ्जे शेर्पां आःया अवस्थाय् विज्ञ पुचः दयेकेमाःगु आवश्यकता हे मदु धयादिल । वय्कलं संविधानसभाया राज्य पुनर्संरचना समितिपाखें राज्य पुनर्संचनाया खाका तकं तयार याये धुंकूगु अवस्थाय् हाकनं विज्ञ पुचः दयेकेगु धाःसा षडयन्त्र यायेत खः उकिं आदिवासी जनजातिय्सं स्वीकार यायेगु जुइमखु धकाः धयादिल । आदिवासी जनजाति दलित गणतान्त्रिक मोर्चाया नायः विश्वासं विज्ञ पुचः दयेकेगु धाःसा प्रस्तावित झिंप्यंगू प्रदेशयात स्यंकेत कुतः याःगु खः धयादिल । वय्कलं संविधानसभाया समितिं दयेके धुंकूगुयात आः छथ्वः बुद्धिजीवीतय्गु नामय् पुचः दयेकाः आदिवासी जनजाति नापं राज्यं बहिस्करणय् लाकातःपिं समुदाययात झंगः लायेत्यंगु दु धयादिसें उकिं आदिवासी जनजातिय्सं बिचाः यायेमाःगु ई वःगु दु धकाः धयादीगु दु । अथे हे आदिवासी जनजाति वृहत्त मोर्चाया छ्याञ्जे डा.कृष्णबहादुर भट्टचनं थीथी राजनीतिक दलया आदिवासी जनजातिय्सं तकं विज्ञ पुचःयात कयाः व्यागलं व्यागलं ब्याख्या यानाच्वंगु दुसां अन्ततः व राज्य पुनर्संरचना समितिया प्रस्तावयात स्यंकेत हे हःगु प्रस्ताव खःधासें आदिवासी जनजाति नापं राज्यं बहिस्करणय् लाकातःपिं समुदायनं विरोध यायेमाः धयादिल । उगु हे कथं नेवाः स्वायत्त राज्यया नितिं संघर्ष यानाः वयाच्वंगु नेवाः स्वायत्त राज्य मंकाः संघर्ष समितिं नं विज्ञ पुचःयात कयाः सरोकार क्यनीगु जूगु दु ।