'संविधानया नितिं खुला म्याद थप यायेगु’
शासकिय स्वरुप व निर्वाचन प्रणाली मिश्रति यायेगु सहमति लिक्क : आचार्य
येँ (झीगु स्वनिगः)
संविधानसभाया संबैधानिक समितिया सभापति निलाम्बर आचार्यं आः संविधानसभाया खुला म्याद थप यायेमाः धकाः धयादीगु दु । खुला म्याद थप यानाः संविधान जारी यायेगु अले अनं लिपा खुलाया दुने निर्वाचन यायेफै धकाः दावी यानादीगु दु । रिपोर्टर्स क्लबया ग्वसालय् म्हिगः आइतवाः जूगु साक्षात्कार ज्याझ्वलय् न्वंवासें वय्कलं अथे धयादीगु खः । संवैधानिक समितिया सभापति आचार्यं कार्तिक १५ गते दलया नेतातय्गु दथुइ जुइगु सहमति कथं दच्छिया दुने संविधान जारी यानाः निर्वाचन यानाः संक्रमणया अन्त्य यायेफै धकाः नं धयादीगु दु ।
राज्य पुनर्संरचनाया विषययात कयाः विज्ञतय्गु पुचः दयेकेगु सहमति जुइ धुंकूगु नापं निर्वाचन प्रणाली व शासकीय स्वरुपया बारे मिश्रति प्रणाली लागू यायेगु सवालय् दलया नेतात सहमति लिक्क थ्यने धुंकूगु दु धकाः नेता आचार्यं धयादिल । वय्कलं संविधान दलतय्गु दथुइ अथे सहमति लिक्क थ्यंगुलिं आःया अवस्थाय् संविधान दयेकेगु आधार तयार जुल धकाः तकं दाबी यानादिल । संवैधानिक समितिया सभापति आचार्यं आः थें हे छुं छुं भच्चा जक हिइकाः प्रत्यक्ष व समानुपातिक जूगु निर्वाचण प्रणाली, राष्ट्रिय प्रणालीया शासन व्यवस्था मजुइगु कथं राष्ट्रपति व प्रधानमन्त्रीया अधिकार बाँडफाँड जुइगु कथं मिश्रीत निर्वाचन प्रणाली दलतय्गु दथुइ सहमतिया संभावना दु धकाः धयादिल । अथे हे प्रतिनिधिसभा व राज्य सभा यानाः निगू सदनात्मक व्यवस्था जुइगु खँय् नं दलतय्गु दथुइ सहमति जुइ धुंकल धकाः स्पष्ट यानादीगु दु ।
वय्कलं थः प्रधानमन्त्री व राष्ट्रपति जनतापाखें प्रत्यक्ष निर्वाचन प्रणालीं ल्ययेगु पक्षय् मदु धयादिसें मुलुकयात राष्ट्रपतीय प्रणालीया शासन व्यवस्था मज्यू धकाः नं धयादिल । आचार्यं धयादिल 'राष्ट्रपतीय प्रणालीचाहिं मज्यू, राष्ट्रपति व प्रधानमन्त्रीया अधिकार इनाः कायेमाः, आःसिबें राष्ट्रपतियात थप अधिकार माः ।'
