शान्ति सम्झौता व लडाकुतय् सम्मान

सेना समायोजनया खँ छगू निष्कर्षय् थ्यनेसातकि देय्या थीथी शिविरय् च्वनाच्वंपिं माओवादी लडाकुतय् दथुइ अनेक आशा, आशंका व कौतुहलतां थाय् कया हःगु दु। खतुं दलतय् दथुइ जूगु न्हय्गू बुँदाया शान्ति सम्झौतायात थीथी शिविरय् च्वंपिं माओवादी लडाकुतय्सं सामान्यतया सकारात्मक रुपं काःगु दु। आः जूगु सहमतियात लडाकुतय्सं उलि सकारात्मक रुपं काःगु हे नं थ्व सम्झौताया दकलय् बांलाःगु पक्ष खः। खतुं गुलिखे शिविरया छुं कमाण्डरतय्सं थ्व शान्ति सम्झौताया आलोचना मयाःगु मखु। तर आलोचना याःपिं धाःसा म्हो जक दु। देशय् गणतन्त्र व संघीय व्यवस्था हयेगु लागिं ज्यानया पर्वाह मयासे ल्वाःपिं लडाकुतय् अपमान जुइ कथंया छुं नं सम्झौता माओवादी जक मखु गुगुं नं पार्टीं याये मजिउ। शिविरय् च्वंपिं लडाकुत ससम्मान अनं पिहां वंसा हे जक भविष्यय् नं उपिंपाखें मुलुकं सेवा काये खनाच्वनी। अपमानित जुयाः पिहां वने माल धाःसा उपिंपाखें कन्हय् हानं मेगु अशान्ति ब्वलनीगु खतरा वइ। थुपिं लडाकुत युद्धकला सिउपिं, ल्वाभः चले याये सःपिं व घरेलु ल्वाभः समेत दयेके सःपिं खः। यदि थुमित गलत मनूतय्सं परिचालन यात धाःसा समाजय् मेगु कथंया अशान्ति व द्वन्द्व सिर्जना जुइफु। उकिं राजनीतिक दाउपेच म्हितेगु नामय् वा देय्या निगू प्यंगू अर्ब दां बचे यायेगु नामय् लडाकुतय्त अलपत्र वा अपमानित यायेगु ज्या कदापी जुइ मजिउ। लडाकुतय् मामिलाय् आः जूगु सम्झौतां अथे अपमानित याः थें सुनां नं महसुस मयाः। उकिं उमित अपमानित यात धकाः अनावश्यक रुपं ग्वाकेगु ज्या नं सुनां याये मजिउ। कार्यान्वयन जुइबलय् नं उमिगु सम्मान कायम हे जुइमाः ।

More Stories Like this